Martxoaren 21etik 23ra greba egin eta gero, apirilaren 20ean izan dute ELAI SERBITZUAK S.L. enpresako ordezkariekin aurrez-aurre biltzeko aurreneko aukera. Baina udalaren azpikontratak hitzarmen estatala aplikatzen jarraitu nahi du.
Udaz geroztik negoziatu nahian dabiltza Hondarribiko udal lorazainak. Lan hitzarmen propioa nahi dute, eta martxoaren 21etik 23ra greba egin ondotik, bost aste eman dituzte ELAI SERBITZUAK S.L. azpikontrata enpresarekin aurreneko negoziaketa bileraren esperoan. Xabier Etxaniz, ELA sindikatuko ordezkariak Antxeta Irratian azaldu duenez, "bileran erantzun dutena whatsapp batekin esan zezaketen, ez dute egungo baldintzak negoziatzeko borondaterik".
Bilera enpresak Hernanin duen egoitzan egin zuten. Eta bistan denez, ez zuen deusetarako eman. Izan ere, ondoko langileen asanbladak maiatzaren 15etik 28ra bi asteko grebaldia egiteko erabakia hartu du.
Hitzarmen propioa
Hondarribiko Udalak lan-baldintzen hobetzeko plusa diruztatu bazuen ere, lan hitzarmen estatala aplikatzen die enpresak lorazainei. ELA sindikatuaren arabera, "gehigarri hori kontuan hartuta ere, inguruko udalerritako udal lorazainekin alderatuta baldintza kaxkarrak dituzte Hondarribikoek". Diotenez, lan hitzarmen estatala apliaktzen jarraitzeko "trikimailuak" erabili zituen enpresak langileei agiri bat sinatuarazteko.
ELAI enpresari 2024 urte arte esleitua dio Hondarribiko Udalak kontratua. Eta esan bezala, inguruko udalerrietan hitzarmen propioa duten bitartean, Hondarribiko lorazainak dira hitzarmen estatala daukaten bakarrak. "Urtean 108 lan-ordu gehiago egiten dituzte Irungoekin alderatuz, eta 300 euro inguru gutxiagoko lansaria suposatzen du".
