Paueko administrazio auzitegiak Michel Hiriart auzapez ohiak aurkeztutako helegitea aztertu du, eta herri txostengileak martxoaren 15eko hauteskundeak errepikatzea gomendatu du. Jendeari ez zitzaiola herriko hautesleku bakarrean sartzen utzi argudiatu du Altxa Biriatuko hautagaiak, eta legeak agintzen du hauteskutxak irekitzeko, hautesleen nortasuna egiaztatzeko eta boto-paperak 100eko gutun-azaletan sartzeko prozeduran ateek zabalik behar dutela. Baina botoak kontatzeko baino ez zituzten ireki. Biriatun Bizik 333 bozka eskuratu zituen, Mixel Hiriart auzapez ohiaren Altxa Biriatuk baino 17 boto gehiago.

EAJ-PNVko Maria Serranok Hondarribiko Udalak 2025eko gastuaren %42 kontu-hartzailearen erreparoarekin ordaindu duela salatu ondoren, udal gobernu taldea gauzak argitzera jendaurrera agertu da. 12,8 milioi euro eragozpen-txostenekin ordaindu dituztenik ukatu du Hondarribiko alkateak, 700.000 euro inguru baizik, eta «denek daukate teknikariaren txostena ordaindu egin behar dela esanez». Oposizioari arduraz eta zintzotasunez jokatu dezala eskatu dio Enparanek, «gezurretan aritzea ez baita praktika ona, Hondarribiak ez du merezi etengabeko distortsioan eta konfrontazioan oinarritutako politikarik».