Hondarribiko historian aurreneko hiri-barneko autobusa martxan jartzeko kontratua lehiaketara aterako du udalak. Udalbatzan onartu dutenez, MUGI sisteman integratuta egongo da zerbitzua, eta 7,1 kilometroko ibilbide zirkularrarekin 18 geltoki izango ditu, goizeko 7:00etatik 21:00ak arte. Udalak bost urtetara esleitu nahi du zerbitzua, eta ia bi milioi euroko aurrekontua bideratuko du.

Igandean jokatuko den Euskadiko 10K Txapelketak Hondarribia luze-zabalean zeharkatuko du 9:30etatik aurrera. Udalak 10:40 arte trafikoan eragina izango duela oroitarazi du, bereziki Alde Zaharrerako sarbideetan 09:25etik 10:00etara, eta Ramon Iribarrenen 10:20 arte. Bihar itxiko dute izena emateko epea, mementuz 710 korrikalarik izena eman dutela dio Higer Komarka Aldea elkarte antolatzaileak.