Bortzirietako hizkera egoera formal eta informaletan, ahozkoan eta idatzizkoan, modu egokian erabiltzeko gomendioak eta adibideak ematen dituen liburuxka da Bortzirietako Euskara Zerbitzuak ondu duena. Euskararen erdialdeko hizkera nagusitu den honetan, bertako formak ez galtzearen alde egiten du gidaliburuak. Eskualdeko herritar orok eskuratu ahal izanen du ale bat, doan, Bortzirietako herri guztietan ezarri dituzten banaketa puntuetan. 

UEMAri babesa emanez, Ernatu zikloari hasiera eman zioten atzo Arantzan. Arantza arnasgune panela estreinatu zuten lehen ekitaldi horretan, Bortzirietako udal ordezkari guztiek, baita Martin Aramendi UEMAko lehendakariak ere. Zikloaren helburua ikerketa soziolinguistikoek diotena iraultzea da, hamar urteko epean arnasguneak desagertzea ekiditea alegia. Iraila osoan zehar bertze lau ekitaldi gehiago eginen dira ekimen honen barrenean, Bortzirietako bertze lau herrietan.