Donapaleutik ihes egiten du Lidek Ez erran inori eleberrian, baina larunbat honetan badirudi bertara itzuliko dela Aldaka Gaztetxeak deituta. Ohiko liburu aurkezpen bat baino, ikuskizun bat prestatu dute Maddi Ane Txoperenaren eleberria aurkezteko. Plazer duenak hilaren 18an ikusi ahal izanen du Touzaa etxean, arratsaldeko 18:00etan.

25 urtez Cristobal Balenciaga diseinatzaile ospetsuaren bikote eta kolaboratzaile, haren itzalpean aritu zen Ramon Esparzari buruzko erakusketa antolatuko dute otsailaren 27tik maiatzaren 4ra Irungo Amaia KZn. “Ramon Esparza, Bidasora itzultzea” erakusketarekin, Irungo modistekin elkarlanean hasi eta Parisen 1972an Chanel frantses moda-etxearen zuzendari kreatibo izatera iritsi zen Esparzaren figura balioan jarri nahi dute.