Ekonomia soziala, ekologikoa eta feminista oinarri hartuta, Bidasoaldean errotu eta gizarteari onura ekarriko dioten negozio berriak, ideia teorikotik proiektuaren garapeneraino laguntzeko 60 orduko Ekintzailetza Programa eskaintzen du BDS KOOP elkarteak. Egungo gizartearen behar eta erronka berriei erantzungo dieten kooperatiba proiektuen bidelagun izan nahi dute. Dornaku Lantz, BDS KOOPeko kideak eman dizkigu xehetasun guztiak.

Herriko inauterietako pertsonaiak diren zakozar eta mairuen irudiak ardatz hartuta, bi hilabetez lanean aritu dira Ekaitz Bertiz, Julia Artieda eta Izaro Iparragirre, hirugarren sektorea dinamizatzeko helburuarekin. Lesakako Udalak, Emplea Fundazioak eta herriko hirugarren sektorearen mahaiak egindako lan deialdian hautatuak izan ziren hiru gazteak eta sentsibilizazio kanpaina bat, lokal hutsen diseinua eta salmentarako whatsapp kanal bat garatu dituzte.