2025eko udaberriaz geroztik Irungo auzoetan gauez «segurtasuna bermatzeko» eta «delituak prebenitzeko» aitzakiapean dabiltzan Auzo Patruilen eskuin muturreko taldeei buruz, orain artean udal agintariek isilarena eman dute. Baina orain, Udaltzaingoaren ardura duen EAJ-PNVko bozeramailea kezkatua eta arduratua agertu da Antxeta Irratian aurreneko aldiz, talde hauek urriaren 2an deitu duten "Irun seguru eta garbiago bat lortzeko" martxarekin erabiltzen duten lengoaia arrazistarekin.

«Ez Nahastu Etsaiz. Irunen Arrazakeriari eta Faxismoari Ez!» lelopean, urriaren 2an 17:45ean elkarretaratzera deitu dute Irungo San Miguel auzoko Alberto Anguera plazan. Ordu laurden beranduago eta leku beretik abiatuta, Irungo auzoetan gauez «segurtasuna bermatzeko» eta «delituak prebenitzeko» aitzakiapean dabiltzan Auzo Patruilen taldeek deitu duten martxa abiatuko da. Kolektibo antifaxistek «patruilak arrazakeria eta gorrotoa zabaltzen duen mehatxu politikoa» direla salatu dute, eta Irunen «arrazismoa eta faxismoa ongietorria ez dela erakusteko» plazara bertaratzeko deia luzatu dute.