Azaroaren 11n greba orokorra deitu du euskal gehiengo sindikalak, eta haiekin batera etxebizitza gizartearen beharren arabera antolatzeko beharra aldarrikatzeko eragile andana batek indarrak batu dituzte Bidasoa eskualdean. "Etxebizitza eskubidea bermatzeko espekulazioari ez" lelopean, gazte eta ikasle mugimenduek, Irungo sei auzo elkartek eta etxebizitza sindikatuek osatutako Bidasoko Greba Batzordeak, larunbatean 12:00etan Zabaltza plazan elkartzeko deia luzatu du. Eta greba egunean, 18:00etan, Mendeluko Zubimuxu biribilgunetik Irungo San Juan plazara manifestazioa. 

Datozen bi asteburuetan Sanmartinak ospatuko dituzte Biriatun. Gastronomiari eta usadio zaharrei lotutako bestak dira hauek, ia herritarren erdia biltzen duen bestak abiatzeko Tripotx Afariarekin hasi eta bigarren asteburuan ospatzen duten Antzara Bazkariarekin amaituz. Tartean, igande honetan, (16:00tan) herriko malda nagusian herriko zaldun gazteek ospatuko duten Antzara Jokoa izango da protagonista nagusia. Baina Besta Komiteak antolatutako kontzertuak edota Mozorro Gauarekin (azaroak 10) jarriko dute jai-giroa.