Asteazken hontan egingo den etxebizitza eskubidearen aldeko greba orokorrak babes zabala jaso du Bidasoan. Sindikatuekin eta hainbat eragilerekin batera, Irungo sei auzo elkartek ere bat egin dute deialdiarekin. Etxebizitzaren krisiak gero eta gehiago baldintzatzen du herritarren egunerokoa: alokairuen garestitzea, etxebizitza eskuratzeko zailtasunak eta gazteen emantzipatzeko ezintasuna dira arazo nagusietako batzuk. Baina krisiak auzoen etorkizuna ere arriskuan jartzen du, bizilagunek beren inguruan bizitzen jarraitzeko dituzten aukerak murrizten baititu. Auzo elkarteek errealitate hori gertutik ezagutzen dute, eta etxebizitza eskubidea aldarrikatzeko mobilizazioarekin bat egin dute. Horren inguruan hitz egin dugu Laurreundi-Olaberria Auzo Elkarteko Mikel Valerorekin.

Azaroak 11ko greba orokorrak lan-baldintza duinak eta langileen eskubideak aldarrikatuko ditu ere, baina etxebizitzaren auzia izango du erdigunean. Aurreko lanuzte orokorretan ez bezala, lan arloko sindikatuekin batera, eragile sozialekin eta etxebizitza sindikatuekin deialdi bateratua luzatu dute, etxebizitza eskubidearen alde eta espekulazioarekin amaitzeko. Bidasoko Greba Batzordeko kideak argi du «kapitalak metaketa» bilatzen duela, eta agintariak interpelatzen ditu lobbyen interesen araberako etxebizitza politika tranpatiak egiten dituztelako. «Ez nahiko politikak dira, etxebizitza ezinbestekoa bada eskubide hori bermatu beharra dago, aldaketa bat beharrezko da».