Jose Antonio Santano San Pedro eta San Martzial jaien ospakizunetaz mintzatu da gaur. Atzo San Juan bezperaan Udalak ez zuen ohiko surik antolatu. Eta jakina den bezala, aurten Udalak uko egin dio jaietako programazioa antolatzeari. Dena dela, pandemiaren bilakaera baikorra ikusita, eta neurrien arintzearekin, irundarrek ahal den neurrian ospatuko dituztela jakina da. Eta horrexeagatik alkateak zuhurtziaz eta arduraz jokatzeko deia luzatu du gaur. “Ahal den neurrian, osasun neurriak errespetatuz eta bereziki lagunen eta senideen zirkulo sozial hurbilekoekin ospatzeko eskatu du”, jakinik bigarren urtez irundarrek ezin izango dutela nahi bezala gozatu.
Dena dela, kritikak jaso ditu Udalak egunotan deus antolatu ez izanagatik. Baina iaz eman izan ziren jende pilaketa kezkagarrien ondotik, alkateak argi du aurten Udalak ofizialki deus ez antolatzeko erabakia egokia dela. “Gehienbat jaietako programa antolatzeak normaltasun sentsazioa sor dezakeelako, eta iaz gertatutakoekin ikaskizuna atera ondotik, errepika ez daitezen erabaki dugu”, adierazi du Santanok.
Halere, udal talde politiko guztietako ordezkariak, udalbatzako korporazio osoak San Martzialgo baselizan botoa egingo du San Martzial egunean 12:00etan. Eta sinbolikoki bada ere, udaletxeko balkoian banderak ezarriko dituzte ekainaren 29an, 30ean eta uztailaren lehenean ere.
