Atzo bertan bi emakume iritsi ziren, eta gaurtik aurrera beraz, trenez ez ezik, ALSAko autobusetan ere eskualdera heltzen hasiko dira migranteak. Oroitarazi behar da, konfinamendu garaian Gurutze Gorriaren ohiko zerbitzuez gain, Irungo Udaleko Gizarte Zerbitzuetatik behar haina diruztatu dute EMAUS erakundeak Zubia eta Martindozeneako zentroetan ere migranteak aterpetzeko. Baina normaltasun berrira itzuli garela, Arretxe-Gainako zentroa bilakatu da berriz ere, harrera gune bakarra.
Zubiak ez dira denentzat ireki
Joan den igandean Ipar eta Hego Euskal Herri arteko mugak berrireki dituztenetik, normaltasun berrian sartu gara. Baina horrek ez du aldaketarik ekarri migranteentzako. Irunera heltzen hasiak diren trantsitozko migranteentzako mugak hetsia jarraikitzen baitu beti. Horren lekuko dira bidasotarrak egunotan. Frantses poliziaren presentzia ez baita guztiz desagertu, eta tarteka auto-lerroak sorrarazten dituzten kontrolak ezartzen dituzte Pausuko eta Santiagoko zubietan.