Baztango Pleura taldeak oholtzak agurtuko ditu asteburu honetan Elizondon. Ion Mayordomok eta Olaia Inziartek eman zioten hasiera ibilbideari eta hainbat aldaketen ondotik, bospasei urte eta gero, zikloari bukaera ematea erabaki dute. Horretarako, “Bertze bat arte fest” festibala antolatu dute, larunbat honetan (abenduaren 23an), Mendialdeko bertze hamar taldeen parte hartzearekin.
Ion Mayordomok eta Olaia Inziartek abiatu zuten Pleura taldearen proiektua. Abestien bertsioak egiten zituzten orduan Lamiak taldean, eta hori alde batera utzita, Unai Urroz eta Julen Zeballosekin batera, rock musika jotzen hasi ziren Pleura izenpean. “Bakarrilketa” albuma kaleratu zuten 2020an eta geroztik, hainbat oholtzetara igan dira nafar musikariak.
Bost urteetan zehar, aldaketak ere sufritu ditu taldeak. Hain zuzen ere, Olaia Inziarte abeslariak Pleura utzi eta bere bide propioa hasi zuen. Orduan, Irati Gutierrez batu zen proiektura eta bera izan da azken urte hauetan taldearen ahotsa. Hala ere, bertze arazo batzuk direla medio, Gutierrezek musika alde batera utzi behar izan du eta beraz, taldeak zikloari bukaera ematea erabaki du.
Mayordomok erran duenez, hasieran erabakia hartzea gogorra izan bazen ere, orain hurbilekoen aitzinean agurtzeko gogoz daude eta horretarako, arratsalde oso bateko egitaraua prestatu dute. Besta handi bat ospatzeko intentzioa du Baztango taldeak “Bertze bat arte fest” izeneko musika festibalarekin. Larunbat honetan, abenduaren 23an, Mendialdeko bederatzi talde egonen dira Elizondoko Merkatuko Plazako oholtza gainean, 16:30etik aitzinera. Tartean, Valentziako Vaire taldeak ere joko du eta musikaz girotuko dute arratsalde guztia.
Bestak segida izanen du arratsez, gaztetxean izanen diren Kalima Limon eta XLKT DJ-ekin, eta kontzertuen tartean ere DJ-ak egonen direla iragarri dute. Sarrerarik gabeko festibala izanen da, baina hurbiltzen direnek borondatea emateko aukera izanen dute eta, bertan biltzen den diru guztia, arratsaldean zehar kontzertua eskainiko dituzten taldeen artean banatuko dute.
Hau izanen da arratsaldeko egitaraua:
- 16:30 Roña
- 17:15 Joseba Irazoki
- 18:00 Sodade
- 18:45 Vaire
- 19:30 Ozpinduk
- 20:15 Ufestuek
- 21:00 Kaskezur
- 21:45 Burutik
- 22:30 Pleura