Dokumentalen Nazioarteko festibalaren aurtengo edizioan euskarazko lau film dira ikusgai, eta horietako bat Beñat Gereka gipuzkoarraren “Itsasoak pizten gaitu” da. 2022ko dokumentala izan arren, asteartean Miarritzeko Kasinoan izan zen aurkezpenean jende andana bildu zen. Ohituren, usadioen eta kulturaren transmisioa lantzen du “Itsasoak pizten gaitu”-k, arrantza herria den Getariaren errealitatea erakutsiz.
Arrantzale gazte eta beteranoak, hemengoak eta hangoak, saregileak, sukaldariak eta kultur sortzaileak elkarrizketatu ditu Gerekak. Dokumental estilo ezberdinak eta teknika ugari nahasiz, ikusteko gustagarria eta bereziki didaktikoa den dokumentala egitea erdietsi du. Kostaldeko paisaien irudi ederrak arrantza ontzien galeraren errealitate gordinarekin kontrastatzen dira pantailan.
Interneten, aurki
Goût du Doc sailean proiektatu da filma, gastronomiaren inguruko lanen sailean. Ostiralean ere ikusgai izanen da, 13:45ean, Bellevue auditorioan. Ondoren, otsailaren 8tik landa, edonorentzat ikusteko moduan zabalduko dute, EITBren Primeran plataforma berrian, urririk.