Bidasoa Atletiko Taldeak (BAT) antolatutako Bidasoko Maratoi Erdia + 10 K lasterketak eskualdea zeharkatuko du igande honetan. 48 ordu besterik ez dira falta inskripzioak itxitzeko. Eta Adur Amilibia, BAT taldeko kideak aitortu digunez, iaz ibilbidea aldatu zutenetik, lasterketak loraldi berri bat bizi du. Izan ere, bertako zein kanpoko lasterkarien interesa piztu du lasterketak. «Ibilbide berria aurkeztu genuen iaz, eta jender asko etorri zen, baina aurten zifrak asko igo dira, kanpoko jendea hirukoiztu egin da, Gipuzkoa eta Euskal Herririk kanpokoa, eta konten gaude», azpimarratu du Amilibiak.
Bestalde, kirol klubetik azken urteetan egiten ari den emakumezkoen kirola sustatzeko ahaleginak kontutan hartuta, bereziki goraipatu nahi izan dute emakumezkoen parte-hartze datuak. BATeko ordezkariak dioenez, «aipagarriena da bi distantzietan gora egin duela emakumeen kopurua, eta marka guztiak apurtu ditugu. 10K lasterketan %44ra iritsi gara, eta maratoi erdian %30era».
Gogoan hartu behar da, lasterketaren ibilbidea homologatua dagoela eta norbere marka hobetzeko aproposa dela, laua delako. Berez, -17 metroko desnibela baitu. Bestalde, SportMundi erakundearekin lankidetzan Mi Dulce Guerrero elkartea laguntzeko helburu solidarioa ere izango du.
Xehetasunak lasterketaz, eta trafikoan aldaketak
Lasterketari dagokionez, 9:50etan hasiko da Irungo Colon pasealekuan, eta maratoi erdia zein 10K lasterketaren helmuga Urdanibia plaza izango da. Ibilbide berriak lasterketa Hondarribiko Kai Berriraino eramaten du ela oroitarazi dute. Eta beraz, korrituko ez duzuten guztientzat, jakin ekimen horren antolaketak hainbat aldaketa ekarriko dituela Irungo eta Hondarribiko trafikoan. Antolakuntzatik herritarrei ibilgailuekin joan-etorriak aldez aurretik planifikatzea gomendatu zaie, eta garraio publikoa erabiltzea ere, ahal den neurrian.
Izan ere, Irungo erdigunea itxita egongo da, eta 12:30ak arte autobus zerbitzuak sahiesbidetik zeharkatuko dute Irun. Beraz, erdiguneko geltokiak ez dira martxan izango. Eta Hondarribian, aldiz, Lur Gorritik azken autobusa igandean goizeko 9:20ean aterako da, eta 11:30ak arte ez da autobusik izango, Foru, Itsasargi, Bernat Etxepare eta Sabin Arana kaleetan. Geltokiak Santa Engrazian eta Arrokan izango dira.
Hondarribian, lasterketa 10:00etan sartuko da Mendelutik, eta aireportuko errepidetik aurrera, gero eskuinera biratuko du Puntalean, Molla ibilbidetik, jarraian Bidasoa Ibilbidea eta Butroi Pasealekua zeharkatzeko. Kai Berrira iritsi eta han buelta emango du Ramon Iribarren pasealekua zeharkatu ondoren, Portuan sartuz, eta Sabin Aranatik Irunera ateratzeko. Udaltzaingoak jakinarazi duenez, Zuloaga kalean larunbatean ezingo da aparkatu, igandeko lasterketa bidea libratzeko. Eta debekua errespetatuko ez duen ibilgailu oro kenduko dute bertatik.