Nafarroako Gobernuak Lesakako Udala saritu berri du 2022an Alondegia eraikina berrasmatzeko aitzinera eramandako prozesu partehartzaileagatik. Jardunbide egokiaren aitortza egin diote honela udalari, garai hartan udala beraren, herriko 30 eragile baino gehiagoren eta partikularren artean egindako prozesuarengatik.
Alondegia Lesaka erdigunean dagoen eraikin publiko handi bat da. Gaur egun, Jubilatuen elkartea hartzen duena, beheko solairuan, baita Beti Gazte elkartea eta Xorroxin Irratia ere, lehen eta bigarren solairuan hurrenez hurren. 2022an “eraikin honek eskaintzen zituen aukera anitzak aztertu” nahi zituen udalak eta “herritar guztiekin horren inguruko hausnarketa egin”, Eneko Fernandez Lesakako Udaleko kultur zinegotziak aipatu duen bezala, “kolektiboak diren erronkei modu kolektiboan erantzuna emateko”.
Partehartze prozesua abiatzeko, Elhuyarren laguntza izan zuen Lesakako Udalak eta hiru fasetan gauzatu zen proiektua: “Lehen fasean, komunikazio planak egin genituen, baita herriko eragileen mapa ere. Gaur egun, lehen eta bigarren solairua erabiltzen dutenekin elkartu ginen prozesuaren berri emateko eta ondotik, bigarren fasean, talde dinamikak egin ziren eraikin honetan egin zitekeena ikusteko. Hemendik, bi ildo nagusi atera ziren eta hirugarren fasean, herritar guztiei irekitako lan saio batzuk egin ziren. Han ateratakoa posta bidez etxeetara bidali genuen, triptiko batzuen bidez, eta bideo bat ere egin genuen hau dena esplikatzeko”.
Honekin guztiarekin, udalaren helburua “partehartze kultura hori herrian sendotzea” izan zen. Udalaren papera “prozesua abiatzea eta finantzatzea” izateaz gain, “saio horietan ateratako ideia eta asmoak gauzatzeko konpromezua hartzea” ere bazen. Hain zuzen ere, “entzutea eta erabakitzea”, bertan parte hartu zuten herritar eta eragile guztien iritziak errespetuz landuz. Fernandezek positiboki baloratu du 2022an egindako prozesu hau, “partehartzea uste baino handiagoa” izan baitzen eta “modu konstruktiboan” hartu zutelako parte guztiek. Honen ondotik, prozesuaren “alde onak eta txarrak” baloratu zituzten, beti baitago zer hobetzeko kultur zinegotziaren ustez, baina jendearen jarrera positiboa ere aintzat hartu zuten balorazioa egin zuten momentuan.
Saria jasotzea ere ona izan da udalarentzat, “egindako apustua kanpotik baloratu” delako. Sari banaketan mahai inguru bat ere ospatu zen eta bertan, esperientzia desberdinak partekatzeko aukera izan zuten sarituek. Hori ere aberasgarria izan zela azpimarratu du Fernandezek eta “bertzeen onespena” ere izan zuen Lesakan abiatutako prozesu partehatzaile honek. Horrela, aitzinera begira, gogoz dago udala horrelako gehiago antolatzeko. Dagoeneko badituzte abian pare bat proiektu. Zinegotziak “Irain Eskola Publikoko patioaren inguruan egindako partehartze prozesua” aipatu du, baita Oinherri Herri Hezitzailearekin parte izanda, sortu duten udal txikia ere. Hauez gain, “proiektu berriak sortu eta entitateekin ahalik eta partehartze handiena izatea” da Lesakako Udalaren hurrengo urteetako helburua ere.