Frantziar eta espainiar estatuen arteko mugaren bi aldeetako suhiltzaile zerbitzuak elkarlana sendotzen ibili dira azken hamarkadan, eta bide horretatik jarraitzeko asmoa berretsi zuten ostiralean Hendaian. ALERT proiektua zena ALERT-PYR da orain, eta Pirinioen aldebitan sute eta hondamendi handien aurrean elkarrekin lan egiteko tresnak plantan ematea du helburu. Hala, elkarrezagutza hobetzea, komunikazioa eraginkortzea eta koordinazio amankomunak sortzea izan dira azken urteetako lan batzuk. Baita hainbat entrenamendu elkarlanean egitea ere.
Pirinioen inguruko eskualde guztiak hunkituak badira, Gipuzkoako eta Pirinio Atlantikoetako suhiltzaileek naturalki egin dute lotura sendoagoa. Kotte Ezenarro Hendaiako auzapezak oroitarazi duenez, 1990. hamarkadatik hainbat kasutan elkarlan eta elkartasuna ezinbestekoak izan dira Irun eta Hendaiaren artean, idorteek suteen aitzinean duten arriskuari aurre egiteko.
Hendaiako eta Irungo suhiltzaile kasernek ekarri dute praktikara elkarlan hau, eta hori formalizatze aldera, irailean bi parkeak ofizialki senidetuko dituzte. Sinbolikoaz harago doan neurri honi esker, « oso erregularki eta modu estrukturatuan elkarlanean aritzea » ahalbidetuko da, Nicole Darrasse SDISen lehendakariordearen arabera. Hala, etengabeko entrenamenduak batera eginen dituzte adibidez bi parkeetako suhiltzaileek bertzeak bertze.
Larungo sute handia mugarri
Erakunde zein suhiltzaileek elkarlanari begira garatutako proiektuen mugarri gisa jarri zuten 2021eko Larungo sutea. Beran hasi eta ondotik Oiartzun, Irun, Urruña eta Azkainera iritsi zen suteak mugaz ez zekien deus, eta hala aurre egin zioten suhiltzaileek ere, elkarlanean, ordu arte teoria zena praktikara eramanez.
Praktika horri dagokionez, komunikazio hizkuntza gisa Euskara erabili nahi lukete suhiltzaile ugarik, Gipuzkoan jadanik egunerokoan egiten duten bezala. Arkaitz Orbegozo eta Ellande Moustirats Irun eta Hendaiako suhiltzaileek bat egiten dute horretan, eta euskaldun gutxi dituen Hendaiako kasernan euskara kurtsoak eskaintzeko aukera izan daitekeela gehitu du Moustiratsek.
Momentuz baina, irailean senidetuko dira Hendaia eta Irungo suhiltzaileen kasernak, eta horri beha dira entzun ditugun suhiltzaileak ere. Elkarren funtzionamendua ezagutu, elkarrengandik ikasi, eta mugari gutxiago so eginez suak indar handiagoz itzaltzeko prest.