«Nahita piztutako sutearen ondorengo kalteak» direlakoan, arrazoi honengatik inkesta egin dezala agindu dio Baionako fiskaltzak polizia judizialari, Urruña eta Biriatu arteko Xoldokogaineko sutearen iturria argitzeko. Joan den ostiralean 17:30etan piztu eta larunbata goizeko 2ak aldera kontrolatu zuten suteak 50 hektarea larre kiskali ditu. 61 suhiltzaile mobilizatu zituzten, eta 24 etxe mehatxatuak izan ziren. Baina kalte pertsonal eta materialik gabe kontrolatzea lortu zuten azkenik.
Aldiz, hego haize zakarraren ondorioz bizkor suspertu zen sua, eta Biriatuko Xoldogainan piztu bazen ere, Urruñako mendi magalean eragin ditu kalte gehienak. Hala aditzera eman digu Filipe Aramendik, Urruñako auzapezak. «Biriatu ere hunkitua izan da, baina lur gehienak Urruñako jabetzakoak izan dira», argitu du.
Hain justu aipatutako hego haize ufada indartsuak aurreikusiak zirenez, sua pizteko debekua agindua zuen prefetak ostiralean. Hortaz, Filipe Aramendik Baionako fiskaltzak duen susmoari buruz ez du zalantzarik. Su kriminala dela uste du auzapezak, nahitara eragindakoa, izan ere, hiru su abiatze ezberdin identifikatu dituzte.