Eskuin muturreko mugimenduek gero eta presentzia handiagoa hartzen ari dira Europan, kaleetan eta espazio politikoan ere. Euskal Herrian eta Irunen ere, hainbat eraso nazi-faxista salatu dituzte eragile ezberdinek joan den irailaz geroztik. Eta Bor-bor hausnarketarako kolektiboak argi adierazi du ezin garela geldirik geratu egoera honen aurrean. Devenir Europeo taldearen tokiko zelula eraso hauen atzean dagoela diote, eta, horren aurrean, «sektore ahulenak babestu eta langile klasearen duintasuna defendatzea» erabaki dute.
Formakuntza politikoa landu ohi du Bor Bor kolektiboak, eta honakoan ere, eskuin muturraren gorakadaren testuingurua aztertzeaz gain, herritarrei horri aurre egiteko tresnak eskaini nahi dizkiete antolatutako hitzaldiekin. «eskuin muturreko mugimendu hauek ezagutu behar ditugu, jakiteko nola aurre egin», diote.
Eskuineko muturraren gorakada Bidasoaldean
Zentzu honetan, Irunen eta Hondarribian ez ezik, Bortzirietan ere hainbat gertakari kezkagarri eman dira azken hilabeteetan. «Propaganda neonazia agertu da, pintaketa faxistak ikusi dira, eta Lakaxita gaztetxearen aurkako erasoak izan dira, baita abenduan Moskuko Gaztetxearen aurkako eraso bortitza ere», oroitarazi dute kolektibotik. Horrez gain, Lesakako Aginako lepoan frankismoaren biktimen oroitarria moztu eta esbastika nazia marraztu zuten mendian. Bor-Bor kolektiboaren arabera, «Eraso hauek ez dira kasualitatea, estrategia baten parte baizik, eskuineko muturreko taldeek Europan zehar sareak ehuntzen ari dira, eta Devenir Europeo bezalako taldeek badute presentzia gure eskualdean ere».
Egoera honi aurre egiteko, Bor-Bor kolektiboak ezinbestekotzat jotzen du herritarren aktibazioa. «Eraso hauek ez dira kasualitatea, estrategia baten parte baizik, eskuineko muturreko taldeek Europan zehar sareak ehuntzen ari dira, eta Devenir Europeo bezalako taldeek badute presentzia gure eskualdean ere». Horri buru egiteko, hainbat ekimen jarri dituzte martxan, eta horien artean, «pentsamendu kritikoa sustatzeko» hitzaldiak antolatu dituzte Irungo auzo elkarteekin elkarlanean. Izan ere, kolektiboko kideek argi dute «faxismoaren aurkako borroka ez dela soilik kalean egin behar, baizik eta kulturaren esparruan ere».
Haien ustez, diskurtso inperialista, xenofobo, arrazista, autoritario, antifeminista eta langilegoaren kontrakoa indartzen ari den honetan, «ideien borroka eta diskurtsoak bere pisua du», munduan eta Europan zabaltzen ari delako, baina gure auzoetan eta egunerokoan ere eragiten du.
Aipatutako hitzaldien aurrenekoa, Larreaundi-Olaberria auzo elkartean izan zen otsailaren 13an, "Guía práctica contra la extrema derecha" liburuaren egile Jordina Arnaurekin. Hurrengoa, astearte honetan (otsailak 25) izango da 18:30ean Landetxa-Katea auzoko eskola zaharrean: "Euskal Herria autoritarismoaren gorakadaren aurrean" izenburupean, Iratzar Fundazioko Iker Eizagirrek emango du. Eta zikloa martxoaren 13an itxiko dute, 18:30ean, "El auge del racismo en entornos multiculturales" hitzaldiarekin, Gipuzkoako SOS Arrazakeriako Mikel Mazkiaranekin.