Larhun mendiaren Lapurdiko magalean auto batetik telefono mugikorrez grabatutako bideo batean animalia bat ageri da lasterka. Itxuraz, otso bat, edo antzeko txakur bat, bakarrik. Joan den otsailaren 22an grabatua da bideoa, soinuan Ici Pays Basque irratiko albistegian Pariseko Laborantza Saloiaren irekieraren berri entzun baitaiteke. Lehenagoko abisu batek eta bideo honek berretsirik, Pirinio Atlantikoetako jendarmeriak OFB Bioaniztasunaren Frantziako Agentziari ikerketa abiatzeko eskatu zion. Larhunen izan ziren asteburuan OFBko basozainak eta bideoaren analisia egin dute adituek. Ondorio argia eman dute ortzegun honetan: otsoa Azkaine aldean ibili zen joan den astean.
Larhunen bertze magalean, Beran, joan den aste bukaeraz geroztik larrialdi mezu ugari ibili dira herriko sare sozialetan eta mezularitza taldeetan. Izan ere, Larhungo bideoa baina egun batzuk lehenago otso itxurako animalia bat grabatu zuen Antxeta Irratiak ikusi ahal izan duen mendiko kamera batek. Gaueko irudia da, eta gibeletik ageri da animalia; otsoa bai, baina txakur bat ere izan liteke. Irudian grabatua dauden datuen arabera, otsailaren 17an grabatu zuen animalia, arratseko 20:00ak pasaturik.
Nafar Gobernuko Ingurumen saileko arduradunekin birritan mintzatu da Antxeta Irratia aste honetan, abisuak jaso dituztela berretsi digute. Haatik, basozain nafarrek ez dute otso arrastorik aurkitu, eta ez dute laborariengandik otsoak ustez hildako kabalei buruzko inolako informaziorik jaso. Azaldu dutenez, otsoak erasoak egin izan balitu, Ingurumen sailak azkar jasoko zukeen hazleen eta aseguruengandik abisua. Ipar Euskal Herriko eta Frantziako autoritateekin harremanik ez du Ingurumen sailak, eta zailtasunak dituzte informazioa trukatzerakoan.
Nafarroako nekazarien EHNE sindikatuak bere aldetik ohar bat helarazi zuen atzo, “ustezko otso” baten presentziaz ohartaraziz. Azken hilabeteetan Bardeetan izan diren otso erasoekin lotu dute azken astekoa, eta erakundeei eskatu diete Ipar zein Hego Euskal Herriko agentziek duten informazioa herritarren eta laborarien eskuetan jartzea. Antxeta Irratiak jakin duenez, Berako hainbat laborarik neurriak hartu dituzte eta azienda baserri eta borda barrenetan atxiki dute azken gauetan.
Otsoak, saldoko animaliak baina baita bakartiak ere
Aranzadi elkarteko zientzialari batekin irudiak partekatu ditu Antxeta Irratiak, eta egun argiko bideokoa otso bat izan daitekeela baieztatu du hark. Taldean mugitzen direla ideia zabaldua da, baina espezie biziki bakartia ere izan daiteke otsoa. Hala, migrazioan hamarnaka eta ehunka kilometro egiten dituztela ziurtatu du zientzialariak. OFB Bioaniztasunaren Frantziako Agentziak berriz, bideoan ageri den animaliaren "morfologia" eta "gizakiengandik ihes egiteko joera" azpimarratu ditu otsoa dela konfirmatzeko momentuan.
Pirinioetan azken hamarkadan usu ikusi dira otsoak, eta EHNEren agiriak azaldu moduan, Bardeetan ere badabil otsoa. EAEn interes bereziko espeziea da, eta 2020an 38 otso eraso zenbatu ziren Bizkaian soilik. Ipar Euskal Herrian, 2022tik ez zen otsorik ikusi ezta erasorik erregistratu ere.