Komunitatearen garrantzia azpimarratzen du Herri Urrats elkarteak, eta kanpainaren lema horren lekuko da "Elgarrekin indartsuagoak gara. Egin zaitez Erlezain!". Bide horretatik, Seaska osatzen duten «erleek bizirik eta aktibo segi dezaten erlezainak behar dira», adierazi dute.
Euskal erle beltzaren irudia baliatu dute kanpaina honetarako. Izan ere, oroitarazi dutenez, munduan dauden 20.000 erle espezieen artean Erle Beltza gurea da, eta erleak komunitatean bizi badira, eta elgarrekin lan egiten badute, «Seaskako komunitatea behar beharrezkoa da ere, euskarak bizirik iraun dezan Euskal Herriko txoko honetan».
Baina Seaska osatzen duten "erleak", guraso, irakasle, langile, ume, gazte lanean jarraitzeko erlezainak behar dituzte. Koldo Rodriguez, Herri Urrats elkarteko koordinatzaileak aipatu digu zertan datza erlezain kanpaina. Sinplea da. Erlezain izateko gutxieneko ekarpena hamar eurokoa da, eta Herri Urratsen webgunean egin daiteke. Webguneaz gain, ikastoletan zein festetan ikusgarri egongo diren puntu fisikoak ere antolatuko dituzte.
Kanpainaren aurkezpenarekin lehenbiziko 25 erlezainen izenak ere jakinarazi dituzte, izen ezagunak denak. Haien artean: Fermin Muguruza, Amagoia Mujika, Idurre Eskisabel, Itziar Ituño, Ana Goitia, Kike Amonarriz, Peio Dufau, Maddalen Arzallus, Joxe Mari Agirretxe, Mertxe Rodriguez, Maider Cigarro, Manex Fuchs, Ximun Fuchs, Asisko Urmeneta, Johanes Echeveste, Peio Iciaga, Jon Maia, Ibai Zabala, Maritxu Housset, Albina Stardust, Maialen Errotabehere, Maddalen Iriarte, Joseina Etxebarria, Olatz Salvador eta Ekain Imaz.
Maddalen Arzallus aurreneko erlezain horietariko batekin hitz egin dugu, aurkezpena Hendaian egin delarik, bertako ikastolan ez ezik, Kolegioan eta Lizeotik ere prozesu osoa egina du Seaskan. Ongi ezagutzen ditu zein baldintzetan egin dute aitzina beti, baina kanpaina honekin «ez dugu errukirik bilatu nahi, Hegoalden jakin behar dute ere, elgarrekin indartsuagoak garela», leloak dion antzera.