Ibilbidea eta egitaraua
Udalekua uztailaren 14an abiatuko da Urruñatik, eta egunez egun ondorengo herriak bisitatuko dituzte gazteek: Sara, Igantzi, Lesaka eta Oiartzun. Herriz herri jarduera ezberdinak burutuko dira, eta uztailaren 20an, Oiartzunen, amaiera emango zaio udaleku ibiltariari.
Ekintzak naturarekin, kulturarekin eta kirolarekin lotutakoak izango dira, euskaraz bizitzeko aukera emanez. Parte-hartzaileek ingurune natural paregabeak ezagutzeko aukera izango dute, euskal kulturaren aberastasunaz gozatu eta euskararen erabilera sustatzeko ekimenetan parte hartu ahal izango dute.
Parte-hartzea eta baldintzak
• 2010 eta 2011 urteetan jaiotako gaztetxoek parte har dezakete.
• Lehentasuna izango dute Bortzirietan, Oiartzunen, Saran eta Urruñan erroldatuta daudenek.
• Euskaraz jakitea beharrezkoa da.
• Gehienez 40 gaztek parte hartu ahal izango dute.
• Gutxienez 15 gaztek izena eman beharko dute udalekua aurrera eramateko.
Izena ematea eta prezioa
Izena ematea online egin beharko da apirilaren 6a baino lehen. Udalekuaren prezioa 150 eurokoa da, eta izen-ematea onartu zaien familiei apirilean jakinaraziko zaie. Antolatzaileek parte-hartzaileekin harremanetan jarriko dira ordainketa prozesua bideratzeko eta dokumentazioa eskatzeko.
Izen-ematea egiteko eta informazio gehiago jasotzeko: Mugaldeko Udalekua 2025
Helburuak eta babesleak
Mugaldeko Udalekuak helburu hauek ditu:
• Iparraldeko eta Hegoaldeko gazteen arteko harremanak sustatzea.
• Euskara eta euskalkiak ezagutu eta praktikatzeko aukera eskaintzea.
• Gazteen parte-hartzea bultzatzea.
• Euskal Herriko natura, kultura eta kirola uztartuz, hainbat txoko ezagutzea.
Ekimen hau Ttur-ttur Euskaltzaleon Bilguneak antolatzen du, eta ondorengo erakundeen babesa du: Bortzirietako Euskara Mankomunitatea, Oiartzungo Udala, Sarako Herriko Etxea, Urruñako Herriko Etxea eta Euroeskualdea