BDS Koopek bere sorreratik bultzatu duen ekonomia soziala sustatzeko helburuak mantentzen ditu "Kooperatuz" deialdiak. Batetik, gizarte-ekonomiako enpresek beste enpresa-eredu batzuetatik bereizten dituzten printzipioak balioan jarri nahian. Eta bestetik, gure inguruan dauden halako proiektu kooperatiboei ikusgarritasuna emateko. Dornaku Lantz BDS Koopeko ordezkariak kooperatiba edo sozietate laboral guztiei animatu die sariketan parte hartzera, «ez du zergatik Mondragonen filial handi bat izan behar, bi laguneko kooperatiba batetik hasita, denek har dezakete parte».
Horretarako, 1895ean Kooperatiben Aliantza Internazionalak adostu eta ezarritako zazpi printzipioak kontuan hartuko dituzte. Eusko Jaurlaritzak kooperatiben erregistroan betearazten dituenak: kideen kudeaketa demokratikoa, kidetza irekia eta borondatezkoa, kideen parte hartze ekonomiko beharrezkoa, autonomia eta independentzia, kooperatiben arteko lankidetza, komunitatearekin konpromisoa, hezkuntza, formakuntza eta informazioa bermatzea.
"Kooperatuz" sariak hau kontuan hartuko du. www.bdskoop.eus/kooperatuz/ atarian eskegita dagoen galdetegia bete besterik ez da egin behar martxoaren 11tik apirilaren 11 artean. Argitu dutenez, inkesta modukoa baino, ordubete hartzen duen galdetegi bat erantzun beharko da, norbere kooperatiban aipatutako printzipioak noraino eta nola betetzen dituen azaltzeko. Sari banaketa ekainaren 13an egingo dute.
Aurtengo nobedadeak
Aurreneko edizioan Bidasoko kooperatibak aintzat hartu zituzten bakarrik. Bigarrenean Gipuzkoara zabaldu zuten deialdia, eta oraingo honetan, EAE osoko kooperatibek parte har dezakete, hala sortu berriak izan, nola ibilbide luzea dutenek ere.
Bidasoaldean ia 200 kooperatiba edo sozietate laboral dauden bitartean, horietatik gehienak logistikaren sektorekoak, iazko edizioan Gipuzkoa mailan industriak indar handia duela ondorioztatu zuten. Gipuzkoan 800 bat kooperatiba dauden bitartean, 1.400 S.L. daude funtzionamenduan. Beraz, kooperatibismoa azkarki garatua dago, bereziki industria arloan. Baina Lantzek azaldu digunez, iazko edizioan sozial arlokoak izan ziren sariketara aurkeztu ziren gehienak. Hain justu, Batera Aske aniztasun funtzionala duten gazteen aisialdi metodologia berritzailea, Maia Permaculture proiektuen lorategi eta baratze diseinugintza, eta arte eszenikoei lotutako Dejabu eta Magma Mia kooperatibak saritu zituzten.
Horrela, trantsizio ekosozialaren bidetik, Gipuzkoan kooperatibismoaren printzipioetan oinarrituta egiten den lana aitortu eta ezagutzera eman zuen sariketak joan den urtean. Haatik, aurten EAE osora zabaldu dute deialdia, eta ez da nobedade bakarra izango. BDSKoopeko Dornaku Lantzek azaldu duenez, «Euskadi guztiko kooperatibek aurkeztu dezakete euren burua, eta aurrekoetan ez bezala, ez dute zergatik eratu berriak izan behar», argitu du, «izan ere, saritu nahi diren kooperatibismoaren printzipioak dagoeneko ibilbide bat egin duten proiektuetan hobeto baloratu daitezke, eboluzioa kontuan hartu».
Alde horretatik, aurrekoetan bezala, Izaera Demokratikoari Saria, barne funtzionamenduan parte hartzea bermatzeko hartutako neurriak kontuan hartuta. Eta bestetik, Komunitate eta Beste Kooperatibekiko Lankidetza eta Interesa Saria banatuko dute, bere ingurunean lankidetza sustatu eta gizartean eragiteko duen gaitasunari begira. Biak ala biak 1.500 euroko saria izango dute.
BDSKoopek jakinarazi duenez, epaimahai kualifikatu batek hartuko du erabakia, Mirene Arri, ELKAR-LAN, Beñat Irasuegi, KOOPFABRIKA eta Itziar Barinaga Rementeria, GEZKIko ordezkariak osatutakoa. Informazio gehiago behar izanez gero, emailez proiektuak@bdskoop.eus helbidera idatzi behar da, edo telefonoz 843 740 198 zenbakira hots egin.
Ekonomiaren definizio primitiboena
Ekonomia Soziala etekin ekonomikoen hazkundea bilatzen dituen ohiko enpresa mundu kapitalistan kontraesankorrak diruditen bi termino irudi dezakete. BDS Koopen, aldiz, argi dute etekinaren aldean gizartearen garapena eta ongizatea behar dela lehenetsi. «Garapena ez da hazkunde hutsa, baizik eta gure beharrak asetzea. Eta behar horiek askotarikoak izan daitezke», argitu dute.
Ikuspegi zabal horrekin, kooperatibismoaren printzipioekin lan egiten duten proiektuak aztertu eta sarituko dituzte hirugarrenez, oraingoan EAE mailan «ekonomia jasangarri, sozial eta bidezkoago bat egingo duen ekonomia baten alde». Izan ere, trantsizio ekosozialaren bidetik, justizia soziala, arte eta kulturaren sustapena, zaintza eredua, berotegi-efektu globala, naturarekin oreka mantenduko duen abeltzaintza eta nekazaritza ustiaketa arduratsua berreskuratzeko beharra, eta beste ehunka erronka ditu gaur egungo gizarteak, eta ekonomiak.