Asteburuan hasiko da euskararen erabileraz gurasoak sentsibilizatzeko hamabostaldia

Antxeta Irratia 2025ko mar. 13a, 15:41

Bereziki gurasoei zuzendutako “Urratsez urrats haurrekin bidea egiten”  izeneko hamabostaldi honetan Hendaia, Urruña, Donibane Lohitzun eta Ziburukko herriek indarrak batu dituzte. Euskararen erabilera bultzatzeko, gurasoak haurren eredu garela kontzientizatu nahi dute. Adituen eskutik 5 mintzaldi eta familian gozatzeko 4 kultur hitzordu izango dira martxoaren 30 arte.  

Hizkuntza ohituretan gurasoak haurrentzako eredu direla kontuan hartuta, martxoaren 15ean, larunbata honetan ekingo diote euskararen erabileraz sentsibilizatzeko helburua duen "Urratsez urrats haurrekin bidea egiten" izeneko hamabostaldiari. Hendaia, Urruña, Donibane Lohizune eta Ziburuko herriek bat egin dute ekimen honekin lehen aldiz, eta martxoaren 30era arte, guraso euskaldun zein erdaldunen kezka eta galderei erantzuteko hainbat hitzordu proposatzen dituzte adituen eskutik, edota familian egiteko.  

Lehen hitzorduak asteburu honetan Ziburun izango badira, Urruñan martxoaren 20ean Kike Amonarrizekin hitzaldia antolatu dute herriko etxean, 18:00etan, “Gurasoak, haurren eredu eta euskara sustatzaile” izenburupean. Martxoaren 23an, 11:00etan, familian gozatzeko kontzertua antolatu dute. Eta Hendaian ere bi hitzordu izango dira, martxoaren 28an 18:00etan Gaztelu aretoan “Zuek duzue giltza” Paula Kasares soziologo nafarrarekin, haurren hizkuntza portaeretan eragiteko bideei buruz. Hilaren 29an borobilduko dute programa Xo0oo! Josteta kantu eta jokoekin, mediatekan. (Ikusi beherago programazio osoa)

Herri bakoitzean hitzordu ezberdinak proposatu dituzte, baina helburu jakin batekin denak, eta denak euskararen erabilera bultzatzeko indarrak bat eginik.

Egitaraua osoa: 

Martxoaren 15a, larunbata, 10:00, Ziburuko Marinela eskolan:
Euskara deskubrimendua guraso erdaldunentzat. 

Plazara

Martxoaren 19a, asteazkena, 14:30, Donibane Lohizuneko mediatekan:
Seme-alabak euskaraz irakurtzen lagundu. 

Haria

Martxoaren 19a, asteazkena, 18:00, Donibane Lohizuneko Grillerie du Port:
Zertarako balio du euskaraz mintzatzeak? 

Michel Feltin-Palas

Martxoaren 20a, 18:00, Urruñako herriko etxean:
Gurasoak, haurren eredu eta euskararen sustatzaile. 

Kike Amonarriz

Martxoaren 23a, 11:00, Urruñako herriko etxean: 
Kontzertua familian. 

Gurashow

Martxoaren 25a, 18:00 Ziburuko mediatekan:
Lagundu! Gure haurra nerabea da! (Eta ez da gehiago euskaraz ari) 

Xan Aire & Elorri Garat

Martxoaren 27a, 18:00, Ziburuko errekoletoetan: 
Euskara: ezagutu beharreko altxor inmateriala. Zein etorkizun adimen artifizialaren aroan? 

Nicolas Tournadre

Martxoaren 28a, 18:00, Hendaiako Gaztelu aretoan: 
Zuek duzue giltza. Haurren hizkuntza portaeretan eragiteko bideak. 

Paula Kasares 

Martxoaren 29a, 11:00, Hendaiako mediateka: 
XoOoo! Josteta kantu eta erhi jokoak. 

Mataham