Hendaia, Urruña, Ziburu eta Donibane Lohizuneko herriek bat eginik, bereziki gurasoei zuzendutako “Urratsez urrats haurrekin bidea egiten” euskararen transmisioari buruzko sentsibilizazio hamabostaldiaren baitan antolatutako hitzaldia da honakoa.
Azken urteetan makina bat hitzaldi eman ditu Euskal Herri zabalean. Eta Kike Amonarriz soziolinguistak dioenez, guraso erdaldunek zein euskaldunek badituzte eginbeharrak eta erronkak euskararen transmisioan. «Denek bere ekarpena egin dezakete, lagundu dezakete, guraso erdaldunei dagokienez, oso garrantzitsua da seme-alaben euskararen ikasketarekiko jarrera positiboa adieraztea, pozten direla, eta haurrek jakin dezatela nahiz eta gurasoek euskaraz ez jakin, gurasoak pozten direla haiek euskaraz egitean». Horretarako ere, euskararen transmisioa etxetik landu dezaketela gogoratzen du, etxean euskarazklo ipuinak, musika, telebista kontsumituz, baita kanpoko aisialdi eta kultur emankizunetan ere.
Lau herriko etxeek, Euskal Hirigune Elkargoak eta Plazara kolektiboak antolatutako sentiberatze hamabostaldia publiko zabalari zuzenduta dago, baina hizkuntza portaeretan eragiterako garaian, gurasoak haurren eredu direla bereziki kontuan hartu nahi du, izan guraso euskaldun, izan erdaldunak.
Joan den larunbatean Ziburun eman zioten abiada programari euskara deskubrimenduarekin, Plazara kooperatibak antolaturik. Eta haur eta familiendako tailer eta ikusgarri zenbaitzuekin batera, adituekin solasaldiek osatuko dute egitaraua. Michel Feltin-Palas kazetaria, Paula Kasares antropologoa, Philippe Blanchet unibertsitateko irakaslea, Kike Amonarriz soziolinguista eta Xan Aire eta Elorri Garat izanen dira hizlariak.
Animazioak eta tailerrak
Bestalde, euskara aisialdi garaian gozamenarekin lotzeak duen garrantziaz jabetuta, hizkuntza manera praktiko eta goxoan baliatuz, gurasoentzat euskara deskubrimendua, euskaraz erraz irakurtzen ikasteko tailerra, Gurashow taldearen kontzertua, eta erhi jokoen inguruko ikusgarria ere izango da.
Hona hemen hurrengo hitzorduen zerrenda:
- Martxoaren 20a, 18:00, Urruñako herriko etxean:
Gurasoak, haurren eredu eta euskararen sustatzaile. Kike Amonarriz. - Martxoaren 23a, 11:00, Urruñako herriko etxean:
Kontzertua familian. Gurashow. - Martxoaren 25a, 18:00 Ziburuko mediatekan:
Lagundu! Gure haurra nerabea da! (Eta ez da gehiago euskaraz ari). Xan Aire eta Elorri Garat. - Martxoaren 27a, 18:00, Ziburuko errekoletoetan:
Euskara: altxor ukiezina ezezaguna. Nicolas Tournadre. - Martxoaren 28a, 18:00, Hendaiako Gaztelu aretoan:
Zuek duzue giltza. Haurren hizkuntza portaeretan eragiteko bideak. Paula Kasares. - Martxoaren 29a, 11:00, Hendaiako mediateka:
XoOoo! Josteta kantu eta erhi jokoak. Matahami
Argazkia: txalaparta.eus