Irungo eta Hondarribiko udalek, Bidasoa Biziriken bitartez, Gipuzkoako Foru Aldundiaren Jasangarritasun Sailarekin lankidetzan, energia-eraginkortasunaren inguruko proiektu aitzindari bat gauzatu dute 2024ko hitzarmenean. Ekimen honek zerbitzu sektoreko hamar enpresa izan ditu partaide, bakoitzari aholkularitza espezializatua eskainiz. Enpresa hauek honakoak dira: Amets Bakery skoop, Kuttuna Ikas eta Jolas S.L, Obrador Garia Berri Coop, Obrador Larreaundi S.L, Bar Gaztelumendi, Hotel Jauregui S.A, Olamar Sol S.A (Hotel Rio Bidasoa), Eurotir Hoteles S.L (Hotel ETH) eta OLA Sagardotegia.
Proiektuan parte hartu duten enpresek txosten pertsonalizatua eta Excel fitxategiak jaso dituzte, euren energia-errendimenduaren jarraipena modu errazean egiteko. Tresna hauek diseinu sinplea dute, enpresei beren kostuen eta kontsumoaren datuak erregistratzeko aukera emanez. Horri esker, urteroko berrikuspenak egiteko eta helburuekiko desbideratzeak ebaluatzeko baliagarriak izango dira.
Nuria Alzaga, Bidasoa Bizirik garapen agentziako presidenteak, nabarmendu du proiektu honen helburua enpresa txiki eta ertainei tresna eraginkorrak eskaintzea dela, haien energia-kontsumoa murrizteko eta iraunkortasuna sustatzeko. Alzagaren arabera, ekimen honen bidez enpresek euren baliabideak modu eraginkorragoan erabiliko dituzte, ingurumen-inpaktua gutxituz eta aldi berean kostuak murriztuz.
Estitxu Urtziberea, Bidasoa Bizirikeko lehendakari ordeak, egitasmo honen garrantzia nabarmendu du eta Hondarribiko enpresentzako duen garrantzia azpimarratu du. Haren hitzetan, halako ekimenek eskualdeko enpresen etorkizun iraunkorra bermatzen laguntzen dute, baliabideak modu arduratsuan kudeatuz eta ingurumenarekin errespetuz jokatuz.
Proiektu honek erakusten du enpresa txikiek eta ertainek energia-eraginkortasuna hobetzeko duten gaitasuna, erakunde publikoen babesarekin. Horrelako ekimenek tokiko enpresei lehiakortasuna handitzen eta jasangarritasun helburuak betetzen laguntzen diete, etorkizun iraunkorrago baterantz aurrera eginez.