Ababor azokaren hirugarren edizioak 40 erakusketari, 30 ontzi eta jarduera programa zabala proposatzen du martxoaren 28tik 30era Ficoban. Turismo nautikoa, itsas-kirol eta zerbitzuak ez ezik, Ficoba portu estalia bilakatu da aurten, Jeanneau, Beneteau, Lagoon, Yamaha, Volvo eta ontzien beste hainbat marka entzutetsurekin batera, aurreneko aldiz bigarren eskuko itsasontzien salmenta gunea ere proposatuz.
Ababor Euskadiko Azoka Nautikoaren III. edizioa Ficoban ospatuko da martxoaren 28tik 30era. Biurteko azoka da orain, eta sektoreko enpresa ugarik, lehen eta bigarren mailako ontzien eskaintza oparoaz gain, erakusketa, dibulgazioa eta entretenimendua uztartuko duen jarduera paralelo anitza jasoko du.
Maialen Gaztañaga, Ficobako azoken arduradunak argitu duenez, Gipuzkoa eta Euskadiko bisitariak eta erakusketariak ez ezik, Akitaniatik ere bisitari asko hurbildu ohi da urtero. Iaz %19 frantses jatorria zuela azpimarratu dute. «Sektoreko terminologia erabiliz, azokak haizea poparean duela esan dezakegu», diote Ficobatik. Izan ere, aurreko bi edizioetan arrakasta lortu du, eta Ababor garrantzi handiko ekitaldia bihurtu da eskualdean, guztira 80 erakusketari eta ia 10.000 bisitari erakarri dituelarik. Ababor azokaren 2023ko edizioaren balorazio baikorra egin zuten bisitariek, eta parte hartzaileen %86k baino gehiagok ziurtatu zuten hurrengo edizioetan parte hartuko zuela.
Sektore nautikoa Hondarribian
Gaur Hondarribiko Kirol Kaian egindako aurkezpenean Igor Enparan alkateak herriarentzat sektore nautikoak duen garrantzia goraipatu du. «Mahai Nautikoa osatu genuen enpresa eta eragileekin, eta potentzial handia duen sektorea dela hausnartuta, Nafarroako erabiltzaileak erakartzeko beharra ikusi dugu, hortaz, Ababor azokan Hondarribiko zerbitzu nautikoen berri emateko postua egongo da», iragarri du. Bestalde, Hondarribiko Itsaskari Baita elkarteak herri mailan haur eta gazteekin egiten duen lana ere gogoan hartu du alkateak, eta «itsasbela, nautika eta kirol-arrantzaren sektore ekonomikoak herrian duen pisuaz harago, bisitariak ere erakarriz, herri mailan aisialdi mota hau gozatzen duten herritar asko» dagoela nabarmendu du.
Sektoreak azken urteetan bizi duen loraldi betearen irudiko dugu itsas-jarduerei lotutako hainbat enpresa herrian. Turistak erakartzeko ez ezik, bidasotarren eskura dauden surf, paddle surfa, itsasbela, itsas-bidaiak, kirol-arrantza, ur-motorrak, coasteering, urpekaritza, kayak etabar luze bat eskaintzen dituzten 14 enpresa eta elkarte daude Hondarribian gaur egun, Euskal Kirol Portuak (EPK) kudeatzen duen kirol kaiaz gain. "Itsasoratu" topaketan eman izan dute horren berri azken urteetan Central Surf Eskola, Hondarribiko Itsaskari Baita, Estatxa, Hiruharri Boats, HS2 Surf Center, Ipar Adventure, Kayak Basque Country, JCPoseidon, Jolaski, Navegavela, Pescahondarribia.com, Surf Teknika Eskola edota Water Joy bezalakoek.
Alde horretatik, Hondarribiko nautika klubeko Xabier Mendigurenek azaldu duenez, Ababor azokaren aurreko asteburuan eta motorrak berotzeko, Hondarribian hainbat jarduera proposatuko dituzte EKP eta Euskal Bela Federazioarekin elkarlanean. Hartara, martxoaren 22an itsasbela ontzi handien irteera antolatu dute, eta Gipuzkoa eta Lapurdiko 40 bat tripulaziok eman dute izena. Beste 15 bat ontzik arrantza lehiaketa batean parte hartuko dute, eta itsasbela eskolako haurren Optimist ontzien "Optimartxoa" estropada antolatu dute.
Ficoban azoka, hitzaldi eta tailer ugari
Martxoaren 28tik 30era, aldiz, Ababor azokak aisialdiko nautikarekin eta uretako jarduerekin zerikusia duten sektore guztiak ukituko ditu, baita turismoa egitekoak, edota uretako esperientzia eta zerbitzuak ere. Azokaz gain, alde dibulgatiboan hitzaldi eta tailer oparoa antolatu dute «bisitarien interesekoa eta azoka balioan jartzen duena». Hiru ardatz nagusitan oinarrituko da aurtengo programa; segurtasuna, ondarea eta abentura.
Maialen Gaztañagak argitu digunez, segurtasunaren arloan Anavre elkarteak parte hartuko du, eta aisialdiko ontzietako segurtasun nautikoaren alorrean duen esperientzia ekartzeaz gain, itsas salbamendurako “Helimer 223” helikopteroa ere hurbilduko da larunbatean Ababorrera. Ondareari dagokionez, Arkeolurrek, Euskadiko portuetako hondoratzeei buruzko lan bat aurkeztuko du, itsas memoria historikoa landuz. Eta Euskadiko Itsasargien Lagunak, itsasargien garrantziaz “Gaueko ziklopeak” hitzaldia emango duen bitartean, Euskal Itsas Museoak ere parte hartuko du azokan. Bestalde, nabigazioa muturreraino eraman ohi duten abenturazalez betea dago kirol nautikoa. Eta horren harira, Mikel Sarasolak kayakean glaziarren eta ur-bizietan egindako esperientziaren berri emateko hitzaldia, edota Asier Agirre nabigatzailearen "Amalurra" liburuaren aurkezpena programatu dute besteren artean.
Haur eta familientzat jolasak
Azkenik, familian bisitatzeko azoka eta sektore nautikoaren topagune bilakatu nahi dutenez, Gaming Gune bat ere izango da aurten. Teknologia, dibertsioa eta lehia konbinatzen dituen esperientzia interaktiboa eskainiko dutela aipatu digu Gaztañagak. Virtual Regatta (estropaden simulazioa), Nintendo Switch-en Mario Kart eta Super Mario Party jolasak, eta arrantza aukeratzen dutenentzat, lehiaketa birtual bat proposatzen die Ababorrek. Irungo Santiagotarrak klubaren eskutik, aldiz, indoor arrauneko ergometro-txapelketa egingo da.
Informazio gehiago, www.ababor.eus helbidean.