Azken orduko aldaketarik eman ezean, bihar eta etziko, eta apirilaren 1 eta 2ko greba egunak bere horretan mantenduko dituzte hezkuntza publikoko irakasleek. Atzo goizaldeko 2:30ak aldera bukatu zuten sindikatuek Eusko Jaurlaritzarekin 19:15ean hasitako hezkuntza publikoaren lan gatazkaren azken negoziazio bilera. Euskal gobernuak greba zikloa desaktibatzeko helburuarekin, eguerditan helarazi zien Steilas, LAB, ELA eta CCOO sindikatuei bere azken proposamena. Eta zazpi ordu baino gehiago eman zuten bilduta Lakuan, baina ez dute akordiorik lortu. Sindikatuen arabera, amaierara arte saiatu dira negoziazioan, «baina jaurlaritzak ez du ratioak jaisteko eskaintzarik egin, ezta lanpostuak egonkortzeko neurririk proposatu ere».
Hartara, Gipuzkoa, Araba eta Bizkaiko 27.000 irakasle baino gehiagok gaur greba egin dute, eta biharko eta etziko, baita apirilaren 1erako eta 2rako deituta zeuden greba egunei ere eusten diete. Izan ere, irakasle postuak %1 baino gutxiago gehitzea proposatu du Lakuak, eta lan baldintza ekonomikoen kasuan, berme eta eperik gabeko %3ko igoera, 2018az geroztik irakasleen erosahalmena %23 batean apaldu denean. Hortaz gain, irakasleen laneko osasun froga eskasak edota azken urteetan okertu egin dituzten ordezkapenen baldintzak ere jarri dituzte negoziazio-mahai gainean.
Haatik, 2010 urtetik daramate EAEko Hezkuntza Publikoan lan hitzarmen berria akordatzeko esperoan, eta atzo goizeko ordu txikiak arte greba egin ahalko zuten ala ez zain egon behar izatea «lotsagarria» dela azpimarratu dute gaur Irungo San Juan plazan elkartu diren 150 bat irakasleek.
Urtarrilean egindako lau greba egunetan ez bezala, oraingo honetan eskola publiko guztietako irakasleek bat egin dute kontzentrazio deialdi komun batean “Hezkuntza publikoan Lan Baldintzak Hobetu!” lelopean. Bertan ziren Dunboa, Belaskoenea, Eguzkitza, Txingudi Ikastola edota Hondarribiko Talaia ikastetxeko hainbat irakasle, baita Irungoak izanik, EAEko beste ikastetxeetan lanean diharduten irakasleak ere.
Gaurko grebaren jarraipena handia izan dela argitu dute sindikatuek. Eta ikastetxez ikastetxe aztertuta honakoa izan da Irunen (HITZAko lankideek bildutako datuen araberako) jarraipena: Elatzeta %72, Plaiaundi ikastetxea %37, Dunboa %71, Eguzkitza LH %66, Toki Alai HH LH %55, Toki Alai BHI %29, Belaskoenea %75, Leka Enea %52, Txingudi HH LH %63, Txingudi BHI %72, Pio Baroja institutua %56.
Hezkuntzaren arazo estrukturala
Sindikatu eta agintariek aurrera daramatzaten negoziazioek zer emango duten esperoan, «irakasleen lan baldintza ekonomikoak ez ezik, gainerako guztia jokoan dagoela» oroitarazi dute. «Hezkuntza Publikoaren aldeko babes eza agerikoa da, itundutako eskolak diru publikoz hornitzen dituzten bitartean, eskola publikoetan irakasleok ez dugu denbora materialik ikasleek merezi duten arreta eskaintzeko, kalitatezko hezkuntza bermatzeko», salatu du manifestarietako batek.
Irun, EAEko Hezkuntza Publikoan gertatzen ari denaren irudikoa dela oroitarazi dute. «Opuseko Erain ikastetxeak heldu den urtean bi lerrora pasatzeko dekretua buletin ofizialean publikatu zuten atzo, diru publikoarekin laguntzen dituzte eliteko ikastetxe pribatuetan bunkerizatuak daudenak, eskola publikoaren kaltetan, politikaren eragina estrukturala da hezkuntzan», azpimarratu dute.
Bien bitartean, Eusko Jaurlaritzak azken 5 urteotako bilakaeraren berri eman zuen atzo, LHn 10.000 ikasle gutxiago daudela esanez EAE mailan. «Ikasle gutxiago dago, baina irakasleok gero eta funtzio gehiago bete behar ditugu, dena protokolizatu egin dute eta ordu asko ematen ditugu ordenagailuen aurrean», gogoratu dute.
Hortaz gain, gizartea aldatzen ari dela ukaezina dela diote, eta Irungo eskola publiko askotan atzerritik etorritako ikasleen integraziorako edota zaurgarriak diren ikasleak laguntzeko ahaleginak egiteko baliabide askirik ez dutela salatu dute. «Txiklea goitik eta behetik estiratu dute hainbeste, erdian dagoen herritar poltsa hori hainbeste findu dute, honek eztanda egin duela», ohartarazi dute irakasleek, «bazen garaia mugitzen hasteko, eta gurasoen partetik ere ohartu dira zein den irakasleen egoera, eta haien seme-alaben hezkuntzan eragin zuzena duela».
Gauzak honela, sindikatuek grebalariekiko eta hezkuntza komunitatearekiko errespetu falta leporatu diote Eusko Jaurlaritzari atzoko negoziaketan agertutako jarrera. Hortaz, berriro ere kaleak hartuko dituzte irakasleek, bihar hiriburuetan, eta ostegunean 11:30ean Donostian, Bulebarretik hasita 11:30ean.