Neguko egun hotz baina eguzkitsu batean sartu ziren Antxeta Irratiko estudiora Yanina Bolognese eta Alejandro Bluhn, Sauce Rojo talde argentinarreko kideak. Hilabeteko bira egin zuten Europan zehar, Argentinan eskuin muturreko gobernuak kulturari etengabe ematen dizkion kolpeetatik ihesaldi txiki bat egin nahian. Hala pausatu ziren egun batzuez Euskal Herrian, eta Agoitzen kontzertu bat eskaini ondotik, irratiko atea gurutzatu orduko beroz eta giro onez bete zen erredakzio gela.
Argentinako musika tradizionaletik eta tangotik edaten dute Sauce Rojoren konposizioek, baina Yani eta Aleren musikari esperientzia oparoan jotako estiloek bustitzen dituzte kantu gehienak. Piano klasikoa hemen, swinga hor, pop musika han. Duoa da Sauce Rojo, bikotea ere badira, baita egokitzen eta denetarik egiten dakiten musikariak ere. Kantu gehienetan, Yaninak du ahotsa eta pianoa ematen, Alejandrok gitarra eta koroak. Antxeta Zuzenekoak saiorako eskaini zituzten bost kantuetan, gitarrista pianoaren gibelean ere jarri zen baina.
Egokitzen dakitenak, Euskal Herrira etortzean ez baitzuten zalantzarik egin haien kantuetan euskara pixka bat sartzen. Minutu batzuez guztien artean hitzak, errimak eta doinuak probatzen egon ondotik, kontzertuko azkena den De Nueces y Canela kantuan “Más libre que yo” “Ni baina askeago” bilakatu zen, “Más libre que vos” berriz “Zu baina askeago”.
Argentinako musika tradizionala haien eremua bada, euskal kantugintza tradizionalean ere sartzen ausartu ziren, eta Joxean Artze eta Mikel Laboaren Txoria Txoriren bertsio propioa ere eskaini zuten. Hamaika bertsio eder dituen eta zoritxarrez bertze hainbertze erabilera perbertso dituen kantua ederra, izugarri ederra da Yaninaren ahotik eta Alejandroren piano notekin entzunda.
Poetikoak dira arrunt Sauce Rojoren hitzak. Naturarekin, bizitzarekin, karrikarekin eta haren aldarriekin lotura intrintsekoa dute; haien esperientzia pertsonalez ari dira, feminismoaz, dantzaz eta tristeziaz. Zume gorritik heldu da taldearen izena ere, Rosario inguruko kostaldean saldoan dagoen zuhaitza; natura, izenetik.
Lukas Magliocchetti Antxeta Irratiko aspaldiko laguntzaileari esker entzun ditzakegu doinu hauek, Rosariokoak baitira bai hura baita Sauce Rojokoak ere. Kantuen artean, matea elkarri pasatzen ziotela, migrazioaz, etxeko egoeraz, musikari eta kulturgileek Mileiren Argentina bizi duten garai nekezaz eta aspaldiko kontzertuetako anekdotak gurutzatzen zituzten. Kontzertuaren ondotik izan zuten elkarrizketa entzungai duzue orri oinean, gazteleraz.
Bost kantu utzi genituen grabatuak neguko goiz hotz hartan, bihotzak berotzeko moduko bost kantu. Guztien gozamenerakoak dira orain.