Hendaian 500 langile dituen EPTA France lantegiko 15 langile Budapesteko (Hungaria) lantegira bidali nahi ditu enpresak. Deslokalizazio hau praktikan langile hauen kanporatzea suposatzen duela salatu du CFDT sindikatuko enpresako langileen komiteak. Era berean, beste 4 langile ere kanporatu nahi ditu Isereko lantegian Frantziako hozgailu komertzialen ekoizle liderra den enpresak, eta horrela urtean milioi euro bat aurreztu. Enpresako Gizarte eta Ekonomia Batzordean, otsailaren 13an egindako ezohiko biltzar batean jakinarazi zien zuzendaritzak erabakia.
Sindikatuak argitu duenez, enpresak iaz 13 milioi euroko irabazi netoak lortu zituen, eta beraz, haien ustez «murrizketa ez dago inolaz ere justifikatua». Garai batean Bonnet Nevé enpresa zena Italiako multinazionalak irentsi zuenetik, «diru gosea» leporatu dio langileek zuzendaritzari.
Gogoan hartu behar baita, 2021eko udaberrian lau asteko lanuzteak egin zituztela CGT eta CFDT sindikatuek bultzatuta, langileen ordainsariak SMICetik hurbil mantentzen zituztelako. Izan ere, soldatak bost urtez izoztuak egon ondotik, 2020ean hileko ordainsaria 4,25 euro baizik ez zitzaien emendatu, zuzendari nagusiak 6,8 milioi euro dibidenduetan jaso zuen bitartean.
Egoerak ez du hobera egin, eta orain 15 langile Hungariara joatea dute langabeziari alternatiba bakarra. Hau salatzeko ostiralean lanuztea egin zuten produkzioa apalduz, eta lantegi hau industria sektoreko Hendaiako handiena izanik, (Hopital Marineekin batera enplegatzaile ez publikorik handiena), Hendaia eta Urruñako auzapezek haien sostengua adierazi zieten langileei mobilizazioan parte hartuz.
Era berean, Peio Dufau, EH Baiko diputatua Parisen bertan izan zen, eta aurreratu duenez, gutunak bidaliko dizkio Akitaniako eskualdeari eta Frantziako Gobernuari ere, azalpenak galdetzeko. «Enpresa handi honek laguntza ekonomikoak jaso berri ditu, eta argitu behar da, ez delako posible tokiko langileak kanporatzen dituen enpresa bat diru publikoarekin lagundua izatea», salatu du Dufauk.
Lantegiaren eragin ekonomikoa
Alde horretatik, Kotte Ezenarro Hendaiako auzapeza kezkaturik agertu da Hendaiako gizarte egituraren etorkizunarekin. Ongi ezagutzen du Intzura (Le Joncaux) industriagunean kokatua den lantegia, aitortuz duenez, 80. hamarkadan Bonnet Neve zenekoan lan egin baitzuen denbora batez. Halako lantegi handiek tokiko ekonomian duten eragina kontuan hartuta, eta herritarren ordezkari den heinean, «gaur hemen naiz, entzuteko eta nire sostengua adierazteko» azpimarratu zuen auzapezak, «enpresa honek errendimendu ona du, ondo dabil, beraz galdetu behar dugu ea deslokalizazio hauek zentzua duten».
Enpresaren erabakiak Hendaiari ez ezik, Urruñari eta inguruko herriei eragiten diela, baita EPTA France lantegiarentzat lan egiten duten beste enpresa txiki anitz ere gogoan hartu du Ezenarrok. Auzapezak bertako enpleguak tokiko lantegietan mantentzeko engaiamendua adierazi nahi izan du: «benetan galdetzen diot nire buruari, hautetsi gisa, langileak eta haien familiak sostengatzea dagokigula, eta saiatu behar dugula deslokalizazio hauek ekiditen», dio.
Era berean, Filipe Aramendik, Urruñako auzapezak gogor kritikatu du Italiako multinazional honen jokamoldea. «Bonnet Neve zen garaian, familia baten antzera kudeatzen zuten, bertako langileekin pentsatuz, baina Italiako enpresa handi honek bereganatu zuenetik akziodunen irabaziak besterik ez dituzte helburu», salatu du Aramendik. Tamalez, «langileen eskubideak gero eta gehiago zangotrabatuak diren garaiotan, enpresa handien jokamolde hauek legeak babesten» dituela gogoratu du.
