Kemen Dantza Taldea eta bere Adaxkaren urteko emanaldia apirilaren 6an izango da Amaia KZn

Aitor Errazkin 2025ko mar. 31a, 11:49

Apirilaren 6an, Irungo Amaia antzokian, Kemen Dantza Taldearen emanaldi berezia izanen da.  Euskal dantzen erakustaldi bikaina eskainiko dute igandean, 18:00etan hasita. Kemeneko dantzariekin batera, Adaxka taldeko 100 haurrek ere parte hartuko dute. Naroa eta Amaiur Kemen dantza taldeko kideekin hitzegin dugu.

Kemen Dantza Taldeak euskal dantzen emanaldi berezia eskainiko du datorren igandean, apirilaren 6an, Irungo Amaia KZn. 18:00etan hasiko den ikuskizunean, Kemen taldeko dantzariekin batera, Adaxka taldeko 100 haurrek ere parte hartuko dute, euskal folklorearen etorkizuna bermatzeko grina erakutsiz.

Emanaldirako sarrerak eskuragarri daude jada Amaia KZren webgunean, baita Luis Marianoko turismo-bulegoan ere. Gainera, egunean bertan, antzokiko txarteldegian eros daitezke, ekitaldia hasi baino ordubete lehenagotik, lekurik geratzen bada.

Amaiur eta Naroa, Kemen dantza taldeak Uranzu frontoian duen egoitzan.

Kemen Dantza Taldeak urteak daramatza euskal dantzak ezagutzera ematen eta Irunen ohikoa bihurtu da haien ikuskizuna. Aurten, Euskal Herriko hainbat txokotako dantzak ekarriko dituzte eszenara, lau blokez osatutako emanaldian. Bereziki aipagarria izango da Lizartzako ihauterien dantzen erakustaldia.

Euskal kulturaren zabalkundea du helburu Kemenen lanak, eta 1973an sortu zenetik, dantza tradizionalak berreskuratzea eta sustatzea izan du xede. Hainbat ekimen ere bultzatu dituzte, hala nola "Hondarribia Dantzan" jaialdia, 2007tik antolatzen dutena. Kemenek euskal ondare kulturala bizirik mantentzeko ahalegina egiten du, eta igandeko emanaldiak horren erakusgarri izango dira.