Aranzadi Zientzia Elkartea apo lasterkariaren Txingudiko populazioa (Epidalea calamita) ikertzen hasi zela 20 urte betetzen dira aurten. Urtero urtero anfibio honen bilakaeraren datuak jaso eta haren kontserbaziorako lanak egiten dituzte, galzorian aurkitzen den espeziea delako. Berez, kaltebera gisa sailkatua dago. Urteurrena ospatzeko, apo lasterkaria ikusteko eta bere habitata zaintzeko beharrari buruz sentiberatzeko bisita gidatua antolatu dute apirilaren 4an, 20:00etan Jaitzubia-Zubieta inguruetan. Ion Garin Barrio Aranzadiko Herpetologia Saileko adituaren eskutik egingo dute, 20 urte baitaramatza apo lasterkaria ikertzen gure eskualdean.
Gipuzkoako Foru Aldundiarekin elkarlanean ari dira apo mota hau babesteko ahaleginetan. Gogoratu beharra dago, Hondarribiko Udalak apo lasterkaria zaintzeko hitzarmena sinatu zuela 2015ean Aranzadi Zientzia Elkartea eta Espainiako Herpetologia Elkartearekin. Haien helburua apo lasterkariak Jaitzubiko laborantza lurretan erabiltzen dituen ugalketa eremuak aztertzea eta zaintzea bada, Plaiaundiko hezegunetik hurbil dagoen Irungo Oxinbiribil eremu babestuan ere hainbat putzu sortu zituen aldundiak duela hamarkada bete, haien bizilekuak zaintzeaz gain, errute guneak zabaltzeko lanetan dihardute.
Gipuzkoako Foru Aldundiko Flora eta Fauna zuzendariak, Iñigo Mendiolak esplikatu digunez, azken urteetan hainbat ekintza burutu dituzte, Hondarribian eta Irungo Oxinbirilen ere apo lasterkariari erruteko gune aproposak eskaintzeko, 10 bat putzu sortu dituzte espreski horretarako. Izan ere, Arbes eta Palmera Montero inguruko urbanizazio proiektuen ondorioz populazioa kaltetu egin zen, eta apo lasterkariaren erruteari leku emateko putzuak behar ziren.
Haatik, jatorri mediterraneoko espeziea izanik, ez da oso ohikoa kostaldeko eremuetan ikustea Euskal Herrian. Baina Bizkaiko Getxoko hondartza batean eta Gipuzkoako Txingudiko padura inguruan populazioak topa ditzakegu. Bere habitat galeraren ondorioz galzorian aurkitzen da. Eta udaberriko gau epelak egokiena direnez, apo lasterkaria ikusteko. Bihar, ostiralarekin 20:00etatik 22:30etara Aranzadik Jaitzubia-Zubieta inguruetara bisita antolatu du. Linterna, arropa eta oinetako egokiak eramateko eskatu dute.
Hitzordua Bidasoko Ospitaleko aparkaleku nagusian eman dute 20:00etan. Eta antolatu ahal izateko, izena eman beharra dago