Eguzki talde ekologistak eta Mutriku Natur Taldeak pozik hartu dute Eusko Jaurlaritzak angularen (aingira gaztea) arrantza-kanpaina bertan behera uzteko hartu duen erabakia. Talde ekologisten arabera, espeziearen egoera “oso larria eta kezkagarria” da, eta urteak daramatzate zientzialariek arrantza eten dadila eskatzen, populazioa berez berreskuratzeko aukera izan dezan.
Jaurlaritzak adierazi du azken txosten zientifikoetan oinarritu dela neurri hau hartzeko, eta datuek baieztatzen dutela aingira europarra “segurtasun-muga biologikoetatik kanpo” dagoela. Arartekoak ere aurretik ohartarazia zuen angularen arrantza profesionalizatzea helburu zuen dekretuak ez zuela oinarri zientifikorik eta Europar Batasunaren araudiaren kontrakoa zela.
Eguzki eta Mutriku Natur Taldeek urte luzez kritikatu dute dekretu hori, eta uste dute Arartekoaren azken ebazpena izan dela Jaurlaritzak norabidea aldatzeko giltzarria. “Azkenik, zientziaren eta biodibertsitatearen aldeko urratsa egin da”, adierazi dute bi taldeetako kideek, besteak beste Juan Mari Beldarrain Eguzkiko kideak.
Hala ere, talde ekologistek ohartarazi dute erabaki hau “beranduegi eta laburregi” datorrela. “Aingira europarra dagoeneko egoera kritikoan dago, eta urtebete edo biko debekuak ez du nahikoa eraginik izango populazioa sendotzeko”, azaldu dute. Horregatik, uste dute egokiena izango litzatekeela debekua zazpi edo zortzi urtez luzatzea, espeziearen ziklo biologikoa errespetatuz eta erreprodukzioa bermatuz.
Era berean, Eguzkik eta Mutriku Natur Taldeak azpimarratu dute debekuarekin batera beste neurri batzuk ere beharrezkoak direla: ibaietako oztopoak kentzea, kutsadura murriztea eta habitat naturalak leheneratzea. “Arrantza gelditzea lehen urratsa da, baina ez da nahikoa. Aingiraren etorkizuna bermatzeko politika integral eta epe luzeko bat behar da”, esan dute.
Amaitzeko, talde ekologistek gogorarazi dute neurri hau ez dela soilik espezie baten defentsa, baizik eta ibaietako biodibertsitate osoaren eta ekosistemen oreka naturalaren aldeko apustua ere. “Jaurlaritzak bide zuzena hartu du, baina orain ausardia eta jarraikortasuna behar dira”, gaineratu dute.