Gipuzkoako landa eremuak etengabeko aldaketen aurrean daude: lehen sektorearen jasangarritasuna, belaunaldi erreleboa eta merkatu berrietara egokitzea dira gaur egungo erronka nagusietako batzuk. Horri erantzuteko, Landaola Federazioak Landan Ekin zerbitzua eskaintzen du, landa eremuko ekintzailetza, ko-sorkuntza eta lankidetza indartzeko.
Ekimen hau Landa Ingurunearen Garapenaren 7/2022 Legean jasotzen diren helburu estrategikoekin bat dator; bereziki, landa sare ekonomikoa dibertsifikatzeko eta enplegua sortzeko beharra azpimarratzen duenarekin. Zerbitzuak aliantza adimenduen metodologia erabiltzen du, nekazaritzako elikagaien balio-katean balio erantsia sortu eta tokiko proiektuen lehiakortasuna handitzeko.
Landan Ekin-ek tokiko eragileei aholkularitza eta bidelaguntza eskaintzen die, ideia baten lehen urratsetatik proiektua egituratu eta martxan jartzeraino. Helburua argia da: Gipuzkoako landa eremuan ekintzailetza berriak sustatzea eta elkarlanaren bidez proiektu sendoagoak eraikitzea.