Lesakako Udalak eta Orekanek hitzarmena sinatu dute Amargun inguruan hiru ikerketa-lursail sortzeko. Guztira, herri-lurretako 3,75 hektarea erabiliko dituzte klima-aldaketak basoetan dituen eraginak aztertzeko.
Proiektuak arboreto bat eta bi erakustoki-lursail izango ditu. Bertan, baso-espezie eta jatorri desberdinak landatuko dituzte, inguruko klima-baldintzetara zein hobekien egokitzen diren jakiteko.
Orekan arduratuko da lanen zuzendaritzaz eta jarraipen zientifikoaz. Lesakako Udalak, berriz, lurrak utziko ditu eta mantentze-lanetan parte hartuko du.
Ikerketa datozen urteetan garatuko da, landareen bilakaera behatzeko eta etorkizuneko basoen kudeaketa hobetzeko. Emaitzek klima-aldaketari aurre egiteko eta Lesakako basoetarako erabaki egokiagoak hartzeko balioko dute.