Venezuelako demokrazia komunala eta herri-boterearen eraikuntza izango dituzte hizpide asteazken honetan, urriaren 14an, Donostian egingo duten hitzaldian. «¡Comuna o nada! Retos del poder popular en tiempos de agresión imperialista» izenburupean, Venezuelako prozesu komunalaren erronkei buruz hausnartuko dute, eraso inperialisten testuinguruan herri-antolakuntzak eta komunitateen parte-hartzeak duten garrantzia azpimarratuz.
Hitzaldian hiru hizlarik hartuko dute parte: Vanessa Perezek, Comuna Cinco Fortalezas-eko eta Union Comunerako kideak; Carlos Teranek, Colectivo Argelia Laya eta Union Comunerako ordezkariak; eta Juan Lenzok, Union Comunerako kideak. Beren esperientzien bidez, antolakuntza komunala eta herri-boterea eraikitzeko prozesuak izango dituzte aztergai.
Donostiako hitzaldia burujabetzari eta demokrazia komunalari buruzko eztabaida Euskal Herrian indartzeko beste hitzordu batekin lotuko da: urriaren 15etik 17ra, topaketak egingo dituzte Hernanin, Gipuzkoan. Hiru eguneko egitarauan Euskal Herriko zein nazioarteko esperientziak bilduko dituzte, herri-antolakuntza, burujabetza eta eraldaketa sozialerako estrategiak partekatzeko.
Hernaniko topaketetan, Italiako, Frantziako, Argentinako, Venezuelako, Kolonbiako eta Kubako ordezkariek hartuko dute parte, besteak beste. Eskuindar muturrari aurre egiteko antolakuntza-ereduak, ikuspegi sektorialak eta ikuspegi integralak aztertuko dituzte. Halaber, Hernani Burujabe proiektua ezagutzeko aukera izango dute nazioarteko ordezkariek, eta Tokiko Gida Eraldatzailearen zirriborroa lantzeko tailerra ere egingo dute.
Bi hitzorduek herri-antolakuntzaren eta komunitateen parte-hartzearen garrantzia jarriko dute mahai gainean, tokiko esperientziak eta nazioarteko prozesuak elkarrizketan jarriz.
Donostiako hitzaldia arratsaldeko 19:00etan izango da, Egia auzoko Teila Fabrikan (Iruresolo plaza, 2). Elkartasun Keinua Venezuelari elkarteak antolatu du ekitaldia, Venezuelako herriarekiko elkartasuna adierazteko eta demokrazia komunalaren inguruko eztabaida Euskal Herrira ekartzeko