Azaroaren 22an Hendaia, Irun eta Hondarribia lotuko dituen triatloi solidario eta feministaren helburu nagusia kirola sentsibilizaziorako eta eraldaketa sozialerako tresna bihurtzea da, indarkeria matxista ikusaraziz eta gaitzetsiz, eta, aldi berean, berdintasuna, emakumeen ahalduntzea zein adin eta kultura ezberdinetako pertsonen arteko bizikidetza sustatuz.
Emakumeak eta hiru hiriak batzeko ekitaldi bat egin nahi izan dute, eta horretarako kirola akuilu lanak egiteko tresna egokia dela pentsatzen dute antolatzaileek. Txingudiko Elkarte Feministak egin zuen lehen urratsa, eta alboko herrietan Hondarribiko Emeki emakumeen elkartea eta Hendaia Uretan elkarteak elkartu ziren gero. Azaroaren 25aren bueltan, Emakumeen Kontrako Indarkeria Ezabatzeko Nazioarteko Egunean, gizarte osoa sentsibilizatu nahi dute.
Hiru modalitate inor behartu gabe
Triatloiari dagokionez, parte-hartzaile bakoitzak hiru modalitate hauetatik bat, bi edo hirurak egin ditzake: lehenik, Hendaian azken urteetan bogan dagoen uretako senderismoa edo oinezko 2 kilometroko ibilbidea antolatu dute hondartzan. Ondoren, 15 kilometroko txirrindularitza proba egingo dute Hendaiako La Floridako portu zaharreko Bidasoa Ordokitik (Tribord) Hondarribiko Bentako aparkalekuraino, eta azkenik, 5 kilometroko korrika lasterkaldia izango da Hondarribian, Benta abiapuntu eta helmugaratzea puntu izanik.
Elkarte bakoitza bere herrian arduratuko da triatloiaren antolaketaz. Eta nabarmendu dutenez, boluntarioek paper garrantzitsua izango dute probaren egunean, ekitaldiaren antolaketa egokia bermatu eta aldarrikapena behar beste zabaldu dadin.
Horretaz gain, egitasmoaren lehen edizioa izanik, biziki eskertu dute babesle aldetik ere jaso duten laguntza, esaterako, Eroskiren, Pasquierren, Kaikuren eta Egarri Edarien babesletza jaso dute, baita eskualdeko hiru udalen laguntza ere. Esker hitzak izan dituzte Bidasoa-Txingudi Mugaz Gaindiko Partzuergoarentzat ere, bertatik emandako diru laguntza bati esker aterako baita aurrera proiektu hau. Orokorrean, antolatzaileak pozik azaldu dira bidean ukitutako ateak zabalik aurkitu izanagatik
Txingudiko Elkarte Feministako Elena Serrano, Emeki elkarteko Tamara Sastre eta Uretan elkarteko Miren Eizagirrerekin hitz egin dugu.