Nafar Lansarek eta France Travail-ek, Mugalan proiektuaren barrenean, Tokiko Enplegu Azoka antolatu dute apirilaren lehenean Beran. Euroeskualdearekin batera, POCTEFA dirulaguntzarekin, heldu den urtean egin asmo duten azokaren saiakera bat izanen da eta helburu nagusia mugako bi aldeetako enpresen eta enplegu eskatzaileen harremanak ahalbidetzea da.
Apirilaren 1ean Beran antolatuko duten Tokiko Enplegu Azokan “dozena erdi bat enpresa” daude izena emanda dagoeneko Mariaje Ganboa Doneztebeko Nafar Lansareko bulegoko arduradunak jakinarazi duenez. Horrez gain, “bertze bizpahiruren informazioa” edukiko dute Nafar Lansarek eta France Travail-ek jarriko duten mahaian. Bertzalde, enplegu eskatzaileen aldetik, “30 bat ditugu apuntatuak, baina jendeak normalean ez du izena ematen. Horregatik, uste dugu Bortzirietako eta eskualdeko jende gehiago hurbilduko dela”, aipatu du Ganboak.
Saiakera bat izanen da Beran eginen dute azoka hau, heldu den urtean Euroeskualdearen laguntzaz egin asmo dutenari begira: “Heldu den urtean POCTEFA onartu da eta Euroeskualdearein lanean ari gara bertze modura antolatuko dugun azoka baten inguruan. Saiakera bat egin nahi genuen ikusteko nola funtzionatzen ahal zuen eta egoten ahal ziren hobekuntzak kontuan hartzeko”.
Tokiko Enplegu Azokak bi helburu nagusi izanen ditu. Batetik, “mugako bi aldeetako enpresen eta enplegu bilatzaileen arteko harremanak sustatzea” izanen da lehen helburua. Mariaje Ganboak azaldu duenez, “France Travail-ekin harremanetan jarri ginen eta erabaki genuen zerbait egin behar genuela bi aldeetako harremanak sustatzeko. Martxoan ere enpresekin gosari bat antolatu genuen eta gure asmoa azaldu genien. Enpresek euren mahaia jarriko dute apirilaren 1ean, baina presentzialki egon nahi ez dutenek ere izanen dute gure bidez euren berri emateko aukera. Guk gure mahaia jarriko dugu, harreman horiek ahalbidetzeko eta beharrezko informazioa emateko”.
Bigarren helburua, hain zuzen ere, informazioa eskaintzea izanen da. Ganboak gehitu duenez, “jendeak ez daki Hegoaldean bizita Iparraldean lan egin daitekeela, edo alderantziz. Administrazio ezberdinak dira eta hori kontuan hartu behar da, baina egin daiteke. Motako horretako informazioa eman nahi dugu eta interesgarria izanen da, ez soilik langabezian daudenentzat, baita enplegua dutenentzat ere”.
Orokorrean, azoka honekin bilatzen dutena da harreman ezberdinak sortzea eta horietan sakontzea: “Ez dugu nahi enplegu bilatzaileak soilik bulegora etortzea, modu tradizionalean. Bertze bide batzuk erabiltzea bilatzen dugu. Momentuan elkarrizketak egitea eta jakitea ea lanean hasiko diren edo ez. Prozesua ezberdin egitea”.
Azoka beraz, apirilaren 1ean ospatuko da Beran, 14:00etatik 18:00etara. Ordutegia ere autoa ez dutenendako egokitu dute, ordu horietan pasatzen baita autobusa Elizondotik Irunera bidean eta alderantziz. Bidasoa Activa eta Cederna Garalur elkarteek ere hartuko dute parte, baita Berako Udalak ere.