A63 autobidearen Biriatuko ordainlekuan itxiera puntualak egingo dituzte obrengatik

Antxeta Irratia 2024ko ira. 23a, 11:27

Vinci enpresak mantenimendu lanak eginen ditu A63 autobidean urriaren 10era arte. Egunez, mozturak egingo dituzte tarteka, eta gauez autobidearen itxiera puntualak iragarri dituzte, asteburuan izan ezik. 

13 eguneko obrak hasi dituzte gaur Biriatuko autobidearen ordainlekuan. Vinci enpresak urriaren 10era arte hobekuntza lanak egingo ditu gau ta egun. Jakinarazi dutenez, bidearen mantenimendu lanak eginen dituzte A63 autobidean, eta horrek hainbat eragozpen eragingo ditu ohiko trafikoan. Egunez, tarteka bideak indargabetuko dituzte, eta gauez autobidearen itxiera puntualak eginen dituzte. Asteburuetan, aldiz, lanak arindu eta lanek ez dute zirkulazioan  aparteko eraginik izango. 

Enpresak argitu duenez, bereziki irailaren 23tik 27ra burutuko dituzte trafiko etendura garrantzitsuenak mugan, eta seinalizazioa ezarriko dute bi norantzetan desbideraketak jarraitzeko. 

Biriatuko autobidearen ordainlekutik egunero 60.000 ibilgailu pasatzen dira batez bestean. Eta hauen %40 inguru kamioiak edo ibilgailu astunak dira.