Bestak azaroaren 6an, ostiralez, idekiko dira ofizialki, arratseko 19:00etan, herriko plazan. Ondotik, 19:30ean, aperitifa animatua eginen da Xoldon, eta 20:30ean tripotx afaria izanen da, Bidekoa taldeak alaiturik. Afariak 25 euro balioko du. Erreserbak azaroaren 2an, 3an eta 4an egin beharko dira, 17:00etatik 20:00etara, Xoldoko elkarte gelan.
Azaroaren 7an, larunbatez, musika izanen da protagonista. 19:00etatik aitzina, herriko plazako karpan, Punttu Kakots, Frigo eta SFM taldeek kontzertuak emanen dituzte. Ondotik, DJa izanen da Hiribarren ostatuan. Kontzertuetarako sartzea 5 eurokoa izanen da, eta doako taxi zerbitzua eskainiko da Pausutik, Urruñatik, Hendaiatik eta Biriatutik.
Igandean, azaroaren 8an, goizeko 9:00etan meza eginen da. Arratsaldean, 16:00etan, antzara jokoa antolatuko da herriko zaldi hoberenekin, eta 18:00etan mutxikoak dantzatuko dira Mutxi’kool taldearen animazioarekin. Egunari bukaera emateko, 19:30ean aperitifa izanen da, Lagunak taldeak animaturik, Hiribarren ostatuan.
Besten egitarauak beste hainbat hitzordu ere proposatzen ditu. Azaroaren 10ean, asteartez, mozorro gaua eta joko olinpikoak eginen dira Xoldo ostatuan, 19:00etan. Azaroaren 11n, asteazkenez, hilen monumentuan ospakizuna eginen da 9:45ean, eta arratsaldeko 14:00etan haurrentzako egitura bat antolatuko da Xoldon, Biriatuko eskolako gurasoen eskutik.
Azaroaren 13an, ostiralez, mus txapelketa jokatuko da Xoldon. Gehienez 32 bikotek parte hartzen ahalko dute, eta izen-emateak 20 euro balioko du bikoteko.
Azken egunean, azaroaren 14an, larunbatez, esku pilota partida izanen da herriko frontoian, 11:00etan. Eguerdian, 12:00etan, aperitifa eskainiko da Hiribarren ostatuan, Kuxkuxtu txarangak animaturik. Ondotik, 13:00etan, antzara bazkaria eginen da Jardins de Bakea jatetxean, Kuxkuxtu txarangaren musikaz lagundurik.