Hitz-joko batetik abiatu zen otsailaren 22an, Lesakan, ospatuko den besta honen izena. Kataluniako eta Euskal Herriko bi ohiturak uztartzen dituen hitza asmatu zuen Alba Rodàk, orain dela sei urte Lesakan bizi den kataluniarrak: calçots-ak eta txotx-a. Hori izanen da ospakizunaren helburua, Lesaka eta Kataluniako Perelada herriak senidetzea eta elkarren arteko harremanak sustatzea, baten zein bertzearen ohiturak ezagutuz.
Orain dela parte bat urte hasi zen Alba Rodà, Lesakako ezagunekin batera, calçotada ospatzen. Hasieran, pandemiaren eraginez, jende guti elkartzen ziren calçot-ak jateko, baina urtez urte mantendu duen ohitura bilakatu da: “Hasieran ezin ginen sobera jende elkartu eta modu xume batean egiten hasi ginen, Elutxako txabolan. Lau eta hamabi lagun artean elkartu izan gara eta hor hasi nintzen ohitura hori hemen ere ospatzen. Lehen urtea hagitz polita izan zen. Nik ilusio handia nuen”. Aurten aldiz, “herrira jeitsi eta mahai handian ospatuko” dute dagoeneko Lesakan ere ohitura bihurtu den eguna.
Rodàk Eneko Fernandez Lesakako Udaleko kultur zinegotziarekin hitz egin zuen ospakizun honen inguruan eta beti erakutsi duen prestutasuna eskertu nahi izan du kataluniarrak. “Lan handia izaten ari da, buruhauste handia, dena ongi ateratzea nahi dugulako”, gaineratu du. Hala ere, jendea gogoz dagoela somatzen du eta horrekin pozik agertu da. Izan ere, laguntza handia izan du besta hau antolatzerako orduan. Bai Lesakako jendearen aldetik, baita Kataluniako jendearen aldetik, babestua sentitu da Alba Rodà.
Senidetze sinboliko bat egiteko asmoa dago eta otsailaren 22an Lesakan eginen dena, irailaren 13an Peraladan errepikatzea. “Ez dakigu zehazki nola eginen dugun, baina leku bat uzteko prest agertu dira hango batzuk. Interesa dago bi aldetik”, adierazi du Rodàk. Udatik bueltan egitekoa dute lesakarrek Peraladara bidaia eta espero duenez, “ideiak sortuko dira hemen eta horren inguruan solasean arituko gara egitaraua finkatzeko”.
`Calçtxotx´ egunean musika eta kantua nagusi
Egun osoko egitarau zabala antolatu dute otsailaren 22an ospatuko den `Calçtxotx´ bestarako. Rodàk azaldu duenez, “eguerdian hasiko gara, sua pizten dugun bitartean, txaranga eta poteoarekin”. Ondotik, bazkaltzeko elkartuko dira Plaza Zaharrean (euria eginez gero, udaletxeko arkupeetan), mahai handi baten bueltan. Calçotsak ez ezik, butifarra, txistorra, xamingoxo eta sagardoa ere dastatu ahal izanen da. Bazkarian parte hartzeko txartela eskuratu beharko da eta horretarako azken eguna, gaur izanen da, otsailaren 12a. Herriko Arrano ostatuan edo Izarra okindegian eros daitezke. Rodàk jakinarazi duenez, dagoeneko “70 bat txartel daude salduta. Kataluniatik 30 bat etorriko dira eta Lesakarik ere 40 bat izanen gara”.
Bazkalondoan kantuan ariko dira, bi herrietan ere ohikoa den moduan. Bertso-glosa saioa ospatuko da, bertsolari euskaldunekin eta glosadore kataluniarrekin: “Katalunian ere inprobisatutako kantuak egiteko ohitura dago eta handik glosadoreak etorriko dira. Talde bakoitzak egiten duena erakutsiko du. Lehenik, bakoitzak ariketa bat eginen du eta gero, jokoren bat izanen da katalunieraz eta euskaraz hitzak asmatzeko. Azkenean, elkarrekin eta bi hizkuntzetan, errimak, bertsoak eta glosak egiten saiatuko gara”.
Eguna borobiltzeko, bi rock talde igoko dira oholtza gainera. Hago Silik talde lesakarra eta Peralada ondoko herri txiki bateko Rural Kids taldea. Rodàk azaldu duenez, “etxeko uzta nahi genuen egunari bukaera emateko”.
Euskal Herria eta Katalunia senidetzeko Lesakan prestatutako egitaraua hasiera bertzerik ez da izanen. Dena ongi ateraz gero, otsailaren 22an sortutako harremanak oraindik gehiago estutzeko aukera izanen dute heldu den irailean ere.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!