Inauteri giroan daramatzagu aste batzuk jada, eta heldu den asteburu honetan ere izanen dugu zer gozatua. Igantzin adibidez, mozorroak janzteko hitzordua izanen dute. «Gogotsu» daudela adierazi digu Larraitz Eugi igantziarrak, haien ohiturei buruzko xehetasunak eman dizkigunak. Ortzirale goizean hasi eta igandeko goizeko ordu txikitaraino luzatzen dute besta, eta horrez gain, heldu den astean Ortzegun Gizen eguna ere ospatuko dute.
Mozorroen eskea izaten da Igantziko inauterietako protagonista. Etxeko arropa zaharren zatiz eta oihal puskez sortutako mozorroak janzten dituzte, eta herriko etxeetan eta baserrietan eskean aritzen dira. Ortziralean eta larunbatean egun osoan zehar egiten dute hori, eta bi egunetan denek elkarrekin afaltzen dute. «Herriko ia etxe denetatik» pasatzea lortzen dutela azaldu digu Eugik.
16 urte beteak izatea da ibilaldian ateratzeko baldintza, eta «hortik goiti edozein» animatu daitekeela gehitu digu. Ongi pasatzeko ez ezik, inauterietako mozorrroen eskea sozializatzeko eta jendea ezagutzeko ere aukera bikaina dela erdietsi du igantziarrak: «Bertako jendearekin egoteko eta normalean egoten ez zaren jende horrekin harremantzeko aukera ematen du».
Goizeko 9:00etan ekinen diote ortziralean eskeari, herriko auzo eta karrikak musikaz alaituz. Horrez gain, arratsaldean herriko gaztetxoenek frontoian musikaz gozatzeko aukera izanen dute 17:00etan, eta Txoborro magoak Gezur gehiegi emanaldia eskainiko du. Mozorroek denek elkarrekin Biltokin afalduko dute ilunabar aldera. Larunbatean ere, goizean goizetik eskea eginen dute. Eguerdian bazkari irekia izanen dute, eta arratsaldean DJ Infernuren musika izanen da. Biltokin afari eder batekin emanen diote bukaera asteburuko bestari.
Ortzegun Gizen eguna otsailaren 27an
Asteburuko lanak eginda, gehiegi luzatu gabe, egun batzuetako deskantsua hartuko dute igantziarrek. Hain zuzen, otsailaren 27an Ortzegun Gizen eguna ospatuta itxiko dituzte inauteriak. Kasu honetan 16 urtez beheitiko gaztetxoak izanen dira protagonistak. Eskolan mailaz-maila banatuko dituzte herriko auzoak, eta etxez-etxe ibiliko dira eskean. Arratsaldean, biltzen dituztenak dastantzeko aukera izanen da Biltokin.
Eguraldiak laguntzen badu, giro ederra izanen da ziur heldu diren egunetan Igantzin, eta Eugik nabarmendu normalean bisita anitz jasotzen ez dituzten arren «nahi duten guztiak» gonbidatzen dituztela inauteriez gozatzera.