Hego Euskal Herrian greba eguna izanen da bihar, sindikatuek hala deituta, "etxebizitza eta soldata duinak denontzat" lelopean. Azaroak 11ko grebaren harira beraz, Baztan-Bidasoaldeko LABek zenbait hitzordu antolatu ditu goiz eta arratsaldez eskualdean.
Goizean hiriburuetan eginen dira hitzordu nagusiak, baina lehenik Baztanen, Malerrekan eta Bortzirietan mobilizatuko dira. Baztanen, 8:30ean egin dute hitzordua gaztetxean kotxe bira egiteko eta Malerrekan ere gauza bera eginen dute. 8:30ean geldituak dira, Doneztebeko Merkatu Plazan hain zuzen ere. Bortzirietan berriz, elkarretaratzea deitu dute Beran, Toki Onan, 10:00etan. Ondotik, 11:00etan Oronoz-Mugairin izanen dute denek hitzordua, Iruñeara joateko kotxeak antolatzeko. Iruñeako manifetazioa 12:30ean abiatuko da Gaztelu Plazatik.
Arratsaldean berriz, eskualdeko mobilizazioa eginen dute Elizondon, 17:30ean plazatik. META Mendialdeko Etxebizitza Taldeak ere egina zuen Donezteben deialdia, baina bertan behera utzi dute Elizondokoarekin bat egin ahal izateko. Horrela, gazte blokea deitu dute Doneztebeko Merkatu Plazatik, 17:15ean, Elizondora abiatzeko. Horrela, eskualdeako eragile sozial eta norbanako guziak deitu dituzte arratsaldeko manifestazio honetara joateko.