Urte hasierako agiantzetan eta elkarrizketetan Kotte Ezenarrok heldu diren hauteskundeen gaia saihestu bazuen, aitzina hartu eta prestakuntzan murgiltzeko deia egin dute Hendaiako PCF alderdi komunistak eta Hendaye en Commun zerrendak. Azken bozetan zerrendaburu izan zen Laurent Tariolek ostegun goizean adierazi zuenez, herritarrekin elkarlanean landu nahi dute programa berria, oinarri finko batzuen gainean: “etxebizitza eskuragarria, osasuna, elbarritasuna, elkartasuna, soziala, zerbitzu publikoak, hezkuntza, ingurumena, lurralde antolaketa, garraioa, turismoa, garapen ekonomikoa, kultura, kirola eta aisialdia”.
“Urtebeteko epea aldi berean luzea eta motza” dela azaldu du Tariolek, proiektu politiko bat eraikitzeko bai bederen. Aipaturiko oinarri horien inguruan herritarrek haien ekarpenak egitea nahi badute, hiru puntu zehatzen inguruan lana indartzeko asmoa azaleratu dute. Gazteei bideraturiko proiektuak sustatu nahi dituzte, baita elkartegintza lagundu eta babestu ere. Eta bereziki, “biztanleria zahartzen ari den eskualde batean”, horrek dakartzan problematika berriei erantzuteko prestatu, “helduenen ongizatea” buruan.
2020an Hendaia Biltzenen aurkako kanpaina gogor baten ondotik, bi itzulien artean bereziki, sozialistek, komunistek eta abertzaleek gehiengoa osatu eta batera hasi zuten legealdia. 2022ko apirilean baina, hilabete luzeko desadostasunen ondotik, Hendaia Biltzenek gehiengoan segitzeari uko egin zion.
Komunistek azken bost urteen bilan “ona” egin dute, “gauzak aitzinarazi eta ideiak eraman” dituztela zehaztuz. “Beti hobeki egin” daitekeen arren, asebeterik agertu da Laurent Tariol orain artekoarekin. Momentuz baina, proiektua zehazteko tenorea dutela zehaztu dute, eta “berantago politikez mintzatzeko, zer bai eta zer ez egin” erabakitzeko aukera izanen dutela. Gauzak hala, hilabetero hirugarren asteazkenetan bilduko dira Hendaian, Merkataritza karrikako Ongi Etorri etxean.
"Haien balioekin bat" egiten duen orori luzatu diete eskua, betiere Europar Batasuneko herritartasuna izan eta helduak diren heinean; hots, zerrendetan aurkezteko eskubidea duten herritarrei bakarrik ireki diete atea.