Hendaia eta New Yorken artean bizi den Camille Perrottet artistaren ekimenez elkartu dira eskualdeko sei emakume sortzaile, Hendaiako Mediatekaren teilatupean, hilabetez. Adin, jatorri, diziplina eta interes ezberdinekoak izanik ere, justizia sozialaren ingurukoak dira ekarri dituzten lan guztiak.
Halako topaguneak falta dituztela argi du Sarah Grandes irundarrak, atelierrak edo sorkuntza guneak amankomunean muntatzea erraza ez delako, baina baita artisten artean dagoen “lehiakortasunagatik” ere. Horiek hala, pozarren hartu zuen Perrotteten proposamena, eta lehenagotik egina zuen baina erakusketaren gaiarekin bat egiten zuen margolan batekin egin du bere parte hartzea.
Elkarrekin, ahots ozenagoz aritzeko
Kikis Alamo, Sarah Grandes, Camille Feyri, Nina Garcia, Annabelle Jackson eta Camille Perrotetek osatzen dute artista seikotea. Argi dute emazte gisa haien arteak ez duela, berez, gizonenak besteko proiekziorik lortuko, eta hartaz elkarrekin eginez gero hedapen handiagoa lortuko dutela. Praktikaz harago ere, justizia sozialaren aldeko mezu feministaz josiak dira erakutsitako lanak, inplizituki edo esplizituki. Manifestaldi bat ikus daiteke han, titi aldarrikatzaile batzuk hor, eta prentsa mozketekin egindako collage bat hemen.
Elkarrekin aritzeak, noski, elkar ezagutzea ere ekarri die sortzaileei, geografikoki hurbilekoak izanik ere ez baitzuten denek bertzeen berri. Artisten lana bakartia da usu, Sarah Grandesek azaldu duenez, baina halakoetan kide berriak ezagutzeak eta haien lana hurbiletik deskubritzeak on egiten diola argi du.
Martxoaren 7an arratsaldeko 18:00tan inauguratuko dute erakusketa, asteazkenetik irekia izanen den arren. Hilaren 29ra arte izanen da bisitatzeko aukera, Mediatekaren irekiera ordutegian.