Hendaiako Gitarralde Festibalaren lekukoa hartu duen Musikolore jaialdiak munduko musika eta ahots mestizaiaren festibala izan nahi du. Bigarren edizioa uztailaren 2tik 5era ospatuko da, eta herriko etxeak iragarri duenez, aurtengo kontzertuen kartela kultur anitza eta musika estilo aldetik ere eklektikoa izango da. Aurkezpena aurrerago egingo dute, baina bertan parte hartuko duten musikarien zerrenda itxi bezain pronto jakinarazi du Hendaiako Kultura Zerbitzuak. Batetik, nigeriar jatorria duen AYỌ abeslari, musikagile eta interprete alemaniarraren eskutik, soul, folk eta reggae estiloaz gozatu ahalko dugu. Eta bestetik, Grupo Compay Segundo kubatar musikaren mito biziak «compañero» nekagarri horiek munduan barne dabiltza beren «Compay-ren historia» kontatzeko gogoz etorriko dira Hendaiara.
Festibalak munduko doinuak bertako musikariekin uztartzeko xedea du. Eta alde horretatik, Baionako David Cairol musikagilearen soul kutsuko reggae estiloa, mendebal afrikar musika elektronikoa Frikunen eskutik edota Ezpeletako latindar erritmoak dantzaraziko dituen Ezpeletako Txokolatin taldeak borobilduko dute kartela.
Antolatzaileek festibalaren lehen edizioa arrakastatsua izan zela nabarmendu dute, hala ikusle kopuru aldetik, nola ikusleen iritzien aldetik ere. Herriko etxeak egitaraua are gehiago azkartzea erabaki du, eta aurtengo edizioa lau egunetara zabaldu du formatu mota anitzi leku egiteko. Emanaldiak Gaztelu aretoan, Varietes zinemagelan, Errepublika plazan eta mediatekan egingo dituzte.
Txartel salmenta dagoeneko aktibatu egin dute www.hendaye-culture.fr eta Mendi Zolan kulturgunean. Bi egunetarako txartela AYO - David Cairol eta Grupo Compay Segundo - Frikun kontzertuetarako 25,25 eurotan saltzen dute.