Hortaz gain, uztailaren 30ean Etchegoyenek kontzertu hurbil eta berezia eskainiko du Larresoroko Seminarioko Kapera ederrean. Duela hamabost urte inguru egin zen ezagun Anne Etchegoyen, bereziki Les Voix Basques diskari esker, 2013an argitaratu eta urrezko album bihurtu zena. Ondoren etorri ziren Compostelle, Donejakue Bideko bere esperientziak inspiratutako lana; Emazte, emakumeei eskainitako omenaldia, eta azkenik Festa, pandemiaren garaian jaiak eta elkarbizitzak duten garrantzia aldarrikatzeko sortutako diskoa.
Urte hauetan guztietan, ehunka kontzertu eskaini ditu Ipar Euskal Herrian, Hego Euskal Herrian, Frantzian eta Espainian zehar, baita Argentinan eta Estatu Batuetan ere, euskal diasporarekin elkartuz. Iraila honetan gainera, KCANTÀ izeneko bilduma berria plazaratuko du. Hizkuntza erregionalen aldeko proiektu berezi honek korsikar, bretoi, okzitaniar, alsaziar, katalan, galiziar eta euskal artistak bilduko ditu. Baita gonbidatu ospetsuak ere, Francis Cabrel, Cali, Claire Keim, Dan Ar Braz, Xoel López edo Itziar Ituño besteak beste.
Bere ahots goxo eta indartsuaren dualitatean, Anne Etchegoyenek publikoari bidaia musikal bihozbera proposatzen dio, euskal sustraiak, eragin latinoak, Donejakue Bideko inspirazioa eta kultur aniztasunaren aldeko ikuspegia uztartuz. Kontzertu bero, hurbil eta parte-hartzailea izanen da, emozioz betea.