Hondarribiak itsasoarengandik bere historian jaso duen ondarea balioan jartzeko helburuarekin, “Hondarribia Itsas-Herria” topaketa antolatu du Udalak lehendabiziko aldiz. Ortzi Alonso, Kultura eta Herri Nortasunerako hautetsiak «herri identitatea, hondarribitarron sena balioan jarri eta kultura eta itsas-ondarean sakondu» nahi dutela azpimarratu du San Pedro kalean egindako aurkezpenean. Udaletxean sartu ziren momentutik argi eduki dute ildo honetan zerbait egin behar zela, eta Udal Goberuaren asmoa da «laurteko honetan jarraipena ematea eta geratzea».
Mendeetan zehar arrantzan erreferentea izan da Hondarribia, baita gaur egun ere, Gipuzkoako arrantzontzi flotarik handiena baitu oraindik. Baina udal ordezkarien ustetan «ahulezi batzuk agerikoak dira azken urteetan, eta oso garrantzitsua iruditzen zaigu aurreko belaunaldietako herritarren esperientziak eta bizipenak hartu, eta kultura horren transmisioa egungoei egitea». Kultura zinegotziak argitu duenez, «arrantzale herria izan da betidanik, baina hirugarren sektorea da gaur egun nagusia herrian. Eta turismoak gauza on asko ekarri badezake ere, hondarribitarron izaera gorde beharra dugu». Eta lan horretan Udala ez dago bakarrik. Hautetsiak Sustraia taldeak itsas-ondarearen ikerketa eta berreskuratzean urteotan egin duen lan eskerga goraipatu du, baita Arma Plazatik bultzatzen den dibulgazio lana ere. Topaketa hauetan parte hartuko dute, baita herriko beste hainbat eragilek ere (ikusi beheko programazioa).
Estitxu Urtizberea alkateordeak ere argi du gorde beharreko altxorra dela herriko itsas-ondarea. Hondarribiarrok nor garen erantzuteko errelatoan itsasoak duen presentzia handia nabarmendu du. «Itsasoak zintzelatu du herritarron izaera, ogibidea eman digu, gure auzoen konfigurazioa eta etxeen kolorea moldatu du, gure hizkuntza aberastu du… eta aktibitate ekonomiko garrantzitsu bat bada ere, itsasoak gure aisialdia betetzen du ere eta pasaia zoragarria dugu», argitu du.
“Itsasoratu” azoka ere
Gure harremana itsasoarekin aldatzen joan bada ere, Hondarribiaren ardatz nagusia da itsasoa oraindik ere. Eta beraz, “Hondarribia Itsas Herria” bezalako jardunaldiak ezinbestekotzat jotzen ditu alkateordeak. Baita maiatzaren 25ean Kirol Kaian ospatuko den “Itsasoratu” ekimena bezalakoak ere. Arrantzaz haratago, aisialdi eta kirol jarduera modernoen eskaintzan erabateko presentzia baitu itsasoak herrian. Eta jarduera ekonomiko garrantzitsua suposatzen duten herriko 14 enpresekin batera, kirol, aisialdi eta eskaintza turistiko honen berri emateko azoka edo jardunaldia ospatuko dute.
Estitxu Urtizbereak argitu duenez, Itsasoratu azokaren lehen edizioan turismo eskaintza gisa eta bisitariak erakartzeko helburuarekin antolatua izan zen. Oraingoan, aldiz, hondarribitarrekin pentsatuz egin dute. «Kanpora begira baino, barrura begira jartzea garrantzitsua dela pentsatu dugu, herritar askok ez dutelako dagoen eskaintza zabala ezagutzen», dio alkateordeak. Horrela, paddle surf, itsasbela, itsas-irteerak, urpekaritza edo surfa denen eskura dagoela erakutsi nahi dute. «Aurreiritzi bat dago, beste maila bateko jarduerak direlakoan edo garestiak, baina edozein herritarrek disfrutatu ditzakeela erakutsi nahi dugu», argitu du Urtizbereak.
Bestalde, enpresa eta elkarteetako partaideek tailerrak eta jarduerak probatzeko aukera emango dute zalantzak argituz. Eta aparteko hitzaldi bat ere izango da, 18:00etan Hondarribiko Itsaskari Baita elkarteak eta Mater elkarteak antolatuta, “Itsas zaintza sarea, itsasoaren alde elkarlanean” hitzaldia antolatu dute, plastikoen kutsadurari buruz sentsibilizatzeko helburuarekin. Maiatzaren 25ean ospatuko da Kirol Kaian, goizeko 11:30etik 14:30era eta arratsaldez 17:30etik 20:00etara.
Hondarribia Itsas-Herria topaketaren egitaraua
Aurretik, aldiz, maiatzaren 16tik 18ra “Hondarribia Itsas-Herria” topaketen aurreneko edizioa izango da protagonista herrian. Itsas-ondarea, hausnarketa, kultur ekitaldiak eta gastronomia ere uztartuko ditu. Arrantzale zapi berezia plazaratu dute, eta azken egunean sardinada herrikoi batekin borobilduko dute. Baina itsasargiak, Bidasoko azken gabarrariak, emakumea eta itsasoaren arteko harremana, Mariñel, Hermandadea eta saregileekin Kofradiara bisita gidatuak, dokumentalak eta mahainguruak, edota Eskifaia abesbatzaren eskutik ere, “Luis Gaiztoak” abestiaren interpretazioa entzuteko aukera izango da besteak beste.
Era berean, bi erakusketa izango dituzue eskura egunotan. Batetik, Euskadiko Itsasargien Lagunak elkarteak Itsas Etxean antolatu duen euskal kostaldeko itsasargien argazki erakusketa. Eta bestetik, Inaxio Igos hondarribitarrak lantzen ari den “Hondarribiko barkuak” lanaren lagin bat. Beñardo Kanpandegik marraztutako herriko baxurako 12 barkuren kartela eta fitxa tekniko-historikoak ikusgai dituzute Hermandade pareko Sare Konpontzaileen plazan eta San Pedro kalean. Sustraia taldeko kideek iragarri digutenez, aurrerago herriko itsasontzi guztien bilduma osatuko duen liburua ere argitaratzeko asmoa du Inaxio Igosek.
Jarraian duzute hiru eguneko egitaraua hitzordu-hitzordu:
MAIATZAK 16
ITSAS ETXEA AUDITORIUMA
18:00tan
“Luz de Mar. Azken Itsasargizainak” dokumentala.
Euskadiko Itsasargien Lagunak. Arratsaldeko
19:00tan
EMAKUMEAK ETA ITSASOA
“Emakumeak blai” dokumentala. Ane Zulaika Zuzendaria.
20:00tan
Mahaingurua: Parte hartuko dute:
Hondarribiko saregilea, Hondarribiko emakumeen traineruaren patroia eta Hondarribiko Kofradiako ordezkaria.
MAIATZAK 17
ITSAS ETXEA AUDITORIUMA
18:00tan
“Hondoxka” Bidasoako azken gabarrariei buruzko dokumentala. Jose Luis Zabala Zuzendaria.
19:00tan
Enrike Lekuona I bekan saritutako lanaren aurkezpena: “Portuarrak, Hondarribiko itsas komunitatearen begirada historikoa”. Aritz Díez eta Josu Narbarte
20:00tan
“Luis Gaiztoak” kantaren interpretazioa Eskifaia Abesbatza.
MAIATZAK 18
ZUMARDIKO PIRUEN PARKEA
10:00tatik 13:00tara
Itsas Modelismo erakustaldia, Bizkaiko Itsas Modelismo Elkartea.
KAI ZAHARREAN
11:00tan
Bisita gidatua Mariñel ontzia (kanpotik), sare konpontzaielak eta Hermandadea.
Hilario Martinez, Pili Goikoetxea eta Gregorio Kanpandegiren eskutik.
ITSAS ETXEA AUDITORIUM
18:00tan
“Hondarribia Hiria Musika Banda”ren kontzertua.
KAI ZAHARREAN
19:00tan
Sardinada herrikoia. Zaporeak-en eskutik.
Beduola itsas elkartearen parte hartzea, batel erakustaldia.