Gaztetxe bat exijitzeko akanpada egin dute Hondarribiko udaletxean

Koldo Nausia 2024ko uzt. 17a, 11:42

2019ko Egiluze jauregiaren okupazioa amaitu eta 4 urte beranduago, atzo 30 gazte inguruk San Telmo gaztelua okupatu zuten. Ertzaintzak desalojatu ondoren, goizeko 2:00etatik Hondarribiko udaletxeko arkupetan akanpatu dute, «turismo masibo eta herri kontsumistatik aldenduko den gazteentzako gune autogestionatu bat lortzeko». Udal ordezkariak Bidasoko Gazte Langileon Asanbladako kideekin bilduko dira lehenbailehen.

Bidasoko Gazte Langileon Asanbladak Hondarribiko udaletxeko arkupetan akanpada egin zuen bart goizeko ordu txikitan, arratsaldean San Telmo gaztelua okupatu eta poliziak kanporatu eta gero. Gaztetxe batentzako egoitza aldarrikatzen dute herrian, eta Udalaren laguntza eskatzen dute horretarako «geroz eta turistifikatuagoa dagoen herrian, sistema kontsumistatik aldenduko den gazteentzako gune autogestionatu bat lortzeko». Diotenez, «bisitariek gure kaleak hartu dituzte eta guretzako ez da ezer geratu, ez dugu non elkartu». 

Atzo San Telmo gazteluaren lorategia okupatu eta poliziak bi lagun identifikatu zituen.

Horiek hala, atzo 30 gazte inguruk okupatu zuten Hondarribiko Udalak 2022an 3,5 milioi euroko inbertsioa eginez erosi zuen 'Piraten gaztelua' ondare historiko-arkitektonikoaren lorategia, eta Ertzaintzak bi lagun identifikatu zituen. Gazte Asanbladak ez zuen erresistentziarik jarri nahi izan baina 15 polizia armaturen presentzia «gehiegikeriatzat» ulertzen dute. 

Bertatik goizeko 2:00etan udaletxeko arkupetara jo zuten eta bertan akanpatu dute. Gaur goizean turista talde gidatuek Kale Nagusian gora argazkiak egiten zituzten bitartean, gazteen kanpin-dendak eta "Gaztetxe Bat Behar Dugu!" aldarrikatzen duen pankarta topatu dute udaletxean. Igor Enparan alkatea haiengana hurbildu da goiz honetan bertan interesatzeko. Eta Antxeta Irratiak jakin izan duenez, gaur bertan Bidasoko Gazte Langileon Asanbladak bildu nahi du aterabideak bilatzeko.

Informazio puntua ere ezarri dute akanpadaren lekuan. 17:00etan asanblada deitu dute. 

Halere, bart gauean Udaltzaingoaren bisita jaso zuten gazteek udal ordenantza aplikatzeko aitzakiarekin, eta arkupeak plaza publikoa ez zirela esanez bertatik desalojatzeko xedez. Gazte Asanbladak udal ordezkariekin bilera egin eta gero, «erantzunak asebeteko baditu» erabakiko dute akanpadarekin jarraitu ala bertan behera uztea.

Aurrekariak eta borondate beharra

Hondarribiko Gazte Asanbladak Alde Zaharreko Egiluze jauregia 2019. urtean okupatu zuten garaiko istilurik ez dute gazteek errepikatu nahi. Eta orain ere, printzipioz garai hartan EAJren Udal Gobernuak eman zizkien administrazioaren mugen argudio antzekoak jaso dituzten arren, Abotsanitz-EH Bildu koalizio gobernu berriaren borondatea bestelakoa izango delako itxaropena dute. «Herriko eraikinak turisten eta aberatsen eskuetan gelditzen ari dira, baina duela bi urte San Telmo gaztelua erosi izanak frogatzen du Udalak baduela herriko ondarearen erabileran eragiteko gaitasuna», diote gazteek.
 
Zentzu honetan, «Udal Gobernua osatzen duten alderdiek eredu turistikoa eta bere ondorioak horrenbeste kritikatu ondoren, gutxienekoa litzateke gure proposamena arrazoizkoa dela onartzea eta espazio bat lortzeko bideorri argi bat proposatzea», exijitzen dute. 
 
Bidasoko Gazte Langileek asanblada deitu dute gaur 17:00etan.