Txingudiko badia ILCA4 klaseko Espainiako Txapelketaren eszenatoki izango da martxoaren 6tik 9ra. Atzo egin zuten lehiaketaren aurkezpena Hondarribiko Itsaskari Baita elkartearen egoitzan. Itsasbelan etorkizun handieneko estropadalariek parte hartuko dute lehiaketan. Antolatzaileek argitu dutenez, 16 urtez azpikoen eta 18 urtez azpikoen kategoriak izango dira, eta 140 parte-hartzaile inguru sartuko dira lehian, Andaluzia, Asturias, Kanariak, Kantabria, Katalunia, Euskadi, Galizia, Balear Uharteak, Murtzia eta Valentziatik etorritakoak.
Euskal taldea Hondarribiko Klub Nautikoko, Donostiako Klub Nautikoko eta Abrako Itsas Klubeko (Getxo) estropadalariek osatzen dute, eta abantaila estrategikoa izango dutela iragarri dute adituek, "etxean" jokatzen dutenez, estropada-eremuaren baldintzetara ohituak daudelako.
Txapelketa, kirolari gazteentzako aukera ez ezik, sektoreko entrenatzaile, epaile eta profesionalentzako topagunea ere bada. Eta 30 pertsona baino gehiago arituko dira antolakuntzan eta logistikan. Eusko Jaurlaritza, Gipuzkoako Foru Aldundia, Hondarribiko Udala, EKP eta Arrantzaleen Kofradiak babestutako lehiaketa da honakoa, eta iragarri dutenez, Hondarribiko ikastetxeetako ikasleei itsasontzi batetik estropadak ikusteko aukera emango zaie.
Itsasbela Federaziotik nabarmendu dutenez, ILCA4 klaseko Espainiako Txapelketa funtsezko plataforma da talentu berriak ikusteko, eta aurreko lehiaketetan gailendu diren maila handiko kirolariak elkartuko baitira Hondarribian. Besteak beste, bertan izango dira Blanca Ferrando, 2024ko Optimist lehiaketako munduko txapelduna; haren ahizpa Marta Ferrando, 16 urtez azpiko Espainiako Kopako txapelduna Tenerifen, eta Iker Mujica, aurten Optimisten taldekako munduko txapelduna eta 2024ko Excellence Cup txapelketako irabazlea.