Hondarribiko Udaleko Gazteria arloak gabonetan aurreneko aldiz antolatutako Izan Arrantzale Hondarribian programaren balorazio baikorra egin dute erabiltzaileek eta haien gurasoek. Hartara, Aste Santuko oporraldietan errepikatzea erabaki dute eguraldia lagun izango dutelakoan. Berez, 8-13 urte bitarteko haurrei zuzendutako bi ekimen proposatzen dituzte, denetan itsasoari protagonismoa emanez. Batetik "Izan Arrantzale Hondarribian" tailerrak apirilaren 14tik 16ra, eta apirilaren 22tik 24ra GazteTek izenekoa bestetik.
Proiektu honetan Done Pedro Itsasgizonen Kofradiak ere parte hartzen du, artisau-arrantzaren sektorearen belaunaldien arteko erreleboa lantzeko helburuarekin. Lupe Queiruga, Gazteria arloko zinegotziak aditzera eman duenez, «garrantzitsua da itsasoarekin harremana mantentzea eta herriak duen izaeraren transmisio hori egitea, belaunaldi berriek jakin dezaten arrantzak izan duen eta oraindik ere herrian duen pisua, zergatik den herria den bezalakoa».
Izan Arrantzale Hondarribian tailerretan, apirilaren 14an arrantzari lotutako eskulanak egingo dituzte, arrantzatu daitezkeen arraien fitxak, itsas-mareen taulak eta halakoak eginez, eta kanabera muntatzen, korapiloak egiten eta arrantza teknika ezberdinak ezagutzeko aukera izango dute, eta ondoren arrantza egitera joango dira. Apirilaren 15ean ere arrantza egiteaz gain, itsas esperimentuak proposatuko dizkiete, itsasoa eta ekologia lantzeko. Eta hirugarren egunean, arrantza egingo dute Portuan, eta tailerrari amaiera emateko itsas produktu eta kontserben dastaketa egingo dute.
GazteTek programan, aldiz, itsasoa ikuspegi zientifiko batetik ezagutu eta landuko dutela iragarri du Queirugak. 3D proiektu robotiko bat egingo dute itsaso baten maketa landuz. Eta hainbat esperimentu egingo dituzte itsasoaren kontserbazioa eta arrantza jasangarriari buruzkoak.
Esan bezala, 8-13 urte bitarteko haurrei zuzendutako eskaintza da, eta izena emateko epea martxoaren 24an itxiko dute, udalaren webgunean edota presentzialki Gazteen Zerbitzuan Astelehenetik ostiralera (16:30-19:30), eta larunbatean 10:00etatik 13:00era.